La Selmana de les Lletres va celebrase del 28 de setiembre al 2 d’ochobre

La convocatoria de la 41 edición foi aplazada'l pasáu mes de marzu de resultes de la crisis provocada pola Covid-19

0
292

La Selmana de les Lletres Asturianes yá tien fecha. La Conseyería de Cultura, Política Llingüística y Turismu anunció esti miércoles que la 41ª edición va celebrase del 28 de setiembre al 2 d’ochobreLa Dirección Xeneral de Política Llingüística, d’alcuerdu cola Academia de la Llingua Asturiana (ALLA), decidió aplazar la celebración institucional de les Lletres Asturianes el pasáu 20 de marzu, de resultes del decretu del estáu d’alarma. Asina mesmo, l’ALLA optó tamién por retardar hasta la seronda’l Día de les Lletres Asturianes, que por tradición tendría de celebrase esti vienres próximu.

La fiesta de la lliteratura n’asturianu y en gallego-asturianu, que se convoca cada añu dende 1980, tendría de celebrase dende’l pasáu llunes hasta’l vienres. Nesta edición, la conseyería decidió dedicar la Selmana a recuperar la figura de l’autora maliaya María Teresa Villaverde, Tuxa (1882-1934), una escritora del Rexonalismu de la primer metá del sieglu XX, poeta, narradora y  dramaturga.

Del 28 de setiembre al 2 d’ochobre, la Selmana de les Lletres va reivindicar la figura de María Teresa Villaverde col lema Tuxa, sentimientu y tradición, y va recuperar nuna publicación la so obra localizada. Amás, va producise un videu sobre la so persona y l’entornu cultural y social nel que trabayó. Ente otros actos de la programación, destaca la celebración el 2 d’ochobre del Día del Llibru Asturianu, nel que collaboren les principales llibreríes d’Asturies.