La presidenta de l’Asociación Cultural Selmana Negra de Xixón, Susana Quirós, y el director del festival lliterariu Selmana Negra de Xixón, Ángel de la Calle, van recoyer esti xueves, 1 d’avientu, en Santa Cruz de Tenerife, la Medaya d’Oru al Méritu nes Belles Artes concedíu pol Gobiernu.
“Esta ye una distinción verdaderamente importante pa nós, porque reconoz el trabayu de muncha xente por impulsar la cultura y averala a tol mundu: trabayadores, voluntarios, los mesmos autores y el públicu que s’avera cada edición allá onde teamos, dándonos el so sofitu y faciendo posible que la Selmana Negra sía lo que ye güei”, afirma Susana Quirós, presidenta de l’Asociación Cultural Selmana Negra, organizadora del certame.
Na mesma llínea amuésase’l director del festival, Ángel de la Calle: “Tamos felices de recibir esti galardón, pero sabiendo que nun ye solo para nós. Hai que dar la norabona a la ciudá, que fai posible que cada branu producir en Xixón esti pequenu milagru cultural. Detrás de tola performance que montamos, como oxetivu ta la promoción de la llectura, y les carpes llenes, añu tres d’añu, dícennos que la Selmana Negra consigue ese oxetivu. Tamos arguyosos”.
El pasáu 28 d’avientu, el Ministeriu de Cultura y Deporte del Gobiernu d’España anunciaba la concesión d’esta distinción al festival lliterariu asturianu por convertise “nun referente de les cites lliteraries combinando, mientres una selmana, lo cultural colo festivo y entemeciendo la lliteratura nacional ya internacional cola música, el cine o la fotografía”.
Esti galardón estrema a les persones y entidaes que destacaren nel campu de la creación artístico y cultural o hayan emprestáu vultables servicios nel fomentu, desenvolvimientu o espardimientu del arte y la cultura o nel caltenimientu del patrimoniu artísticu.
Fundáu por Paco Ignacio Taibo II, el so primer director, y anguaño dirixíu por Ángel de la Calle, el certame ta entamáu pola Asociación Cultural Selmana Negra y col sofitu de diverses alministraciones, lo mesmo que de patrocinadores privaos, el festival lleva celebraes trenta y cinco ediciones, lo que lo convierte nel certame lliterariu más llonxevu d’España.
