El festival lliterariu, cultural, reivindicativu, festivu y popular más llonxevu d’España volverá ocupar los terrenes del antiguu astilleru Naval Xixón un branu más. Y yá van 37. Como yá s’adelantró mientres l’actu de clausura de la edición de 2023, la XXXVII Selmana Negra va tener llugar del 5 al 14 de xunetu, con más d’un centenar d’autores y artistes invitaos y una ensame de propuestes que van tener como filu conductor l’espíritu reivindicativu y les señes d’identidá del festival cultural, cola bandera de los derechos humanos como pilastra fundamental.
La vocación que caltien el certame dende los sos oríxenes de construyir una gran fiesta popular al rodiu de la lliteratura que, amás, hermane a esta con otros llinguaxes artísticos como la música, el cine o la fotografía, va siguir dándose la mano cola fiesta, l’ociu y los distintos llinguaxes de los que se sirve la narración pa esplicase. Y, como siempres, too ello frente a la mar, con munchos de los meyores creadores y artistes del mundu, ente y cola xente. Bien variaos van ser les temes que van componer les actividaes y los alderiques del alcuentru d’escritores y autores esti próximu xunetu na Selmana Negra.
Les yá más que consolidaes trés carpes d’actividaes simultánees van dexar siguir con un eleváu númberu de presentaciones de llibros y alcuentros col públicu, a lo que se van sumar los espacios y meses dedicaos a analizar les últimes aportaciones na novelística negra, cuantimás la escrita n’español, anque non solamente. Tampoco van faltar los apartaos pa los xéneros habituales na Selmana Negra, como la novela histórica, la ciencia ficción y la fantasía, el llibru de non ficción, la poesía y llinguaxes como’l cómic, la fotografía, el cine de ficción y documental y la plástica.
Ente les primeres pincelaes de lo muncho que va traer consigo esta trixésima séptima edición podemos destacar una serie d’actividaes destinaes a rindir homenaxe a figures que tuvieron un papel decisivu na Lliteratura y na Cultura, asina, con mayúscules, a entrambos llaos del océanu. La Selmana Negra de Xixón va rindir el so propiu y sentíu homenaxe a Julio Cortázar nel 110u aniversariu de la so nacencia, y va facer de la mano de nomes
como Olga Lobo, Juan Cruz, Jesús Marchamalo y Javier Serena. Tamién Paco Ignacio Taibo va tener la so reconocencia nesta edición del festival pa celebrar el centenariu de la so nacencia, según Juan Carlos Onetti, cuando se cumplen 30 años de la so muerte. Nesti casu, cola presencia d’Hortensia Campanella, presidenta de la Fundación Mario Benedetti y amiga personal de Onetti.
Y particularmente especial va ser l’homenaxe a unu de los poetes más destacaos de la lliteratura española del sieglu XX y unu de los principales esponentes de la Xeneración del 98. La SN va conmemorar el 85o aniversariu de la muerte d’Antonio Machado y va facese con una conferencia pintada, ‘Yo voy soñando caminos’, de la mano de l’artista Leticia Ruifernández.
