La banda de fusión La Tarrancha, va zarrar la xira de conciertos del 2022 con un conciertu mui especial. Coincidiendo con que nel 2023 cúmplense 20 años del nacimientu de la banda, van dar un conciertu col nome “Camín del Venti”. Va ser el 19 de payares nel Teatru Vital Aza, de L.lena. De mano, paez un llugar un poco raru pa un conciertu d’una banda qu’anima a baillar, pero en realidá, ye’l llugar afaízu pa una gala llena de collaboraciones y calor fraternal. El conciertu ye de baldre y arranca a les 19:00h polo que, encamiéntase a a la xente llegar ceo.
“Camín del Venti”, nun fai referencia namás a los venti años, sinon también al nome de la xira que va faer la banda nel 2023, que nun va ser otru que Venti. El conciertu va grabase, de mano, pa tener constancia del momentu, anque nun se descarta asoleyar de dalguna forma el material, ya sea peles redes o en formatu físicu.
Venti años dan pa muncho y pa poco, así ye que pel grupu pasaron una montonera músicos, hebo mil anedotes, kilómetros de carretera, penes, allegríes, seis discos, más dellos compilatorios con canciones especifiques pa ellos, cenciellos… Y sobre too munches amigues y amigos nel camín. Pal conciertu “Camín del Venti”, La Tarrancha va contar con una parte de la so familia de músicos tarrancheros.
– Nano a la guitarra, excomponente y fundaor de la banda, conocíu por formar parte de grandes bandes punk de los 90.
– Simón San Jose, percusionista y lutier que también foi batería de La Tarrancha.
– Paco Calero, actualmente en Gemtonics y Bindy Bazaar. El vallecanu también ye un tarranchasuplente, nel so casu al baxu.
– Dani Valdés, batería actual de La Mueska y como suplente en LaTarrancha.
– Dani Alvarez. Conocíu multiiinstrumentista nel mundo folk y habitual collaboraor de La Tarrancha a les flautes, buzuki y gaita.
– Nel de Purnea, esti baxista y guitarrista que forma parte de Juanillous, Vrienden o pasó per bandes como Muñeco Vudu, también foi baxista suplente un tiempo en La Tarrancha.
– Gaiteros y percusionistes de la BG Villaviciosa. Nun ye la primer vez que dellos músicos d’esta banda gaites collaboren con La Tarrancha tanto n’estudiu como en directo.
– Los mandos del soniu y la grabación del conciertu van tar en manes de los dos técnicos actuales del grupu. El técnicu y productor Zeros, y el técnicu y cantante Ruboh, qu’aparte de faer el soníu va mangase nel escenario pa cantar una.
Ye una pena que caigan del cartel les colaboraciones de Carlos García Villamil y de Nico Braña, que por compromisos llaborales nun van poder tar acompañando a La Tarrancha.
