La Unesco va evaluar l’espediente de la candidatura de la cultura sidrera asturiana pa ser Patrimoniu Mundial Inmaterial dientro del so ciclu 2023-2024. La organización comunicó güei al Gobiernu d’Asturies que la candidatura de la cultura sidrera va tar ente los 55 aspirantes que se van valorar nel próximu periodu. La decisión final sobre la inclusión na Llista Representativa del Patrimoniu Mundial Inmaterial va conocese a finales del próximu añu.
L’espediente técnicu ye frutu de más de nueve años de trámites que s’empecipiaron colos preparativos pa la declaración de la cultura sidrera como Bien d’Interés Cultural Inmaterial en 2014. La candidatura nun pudo ser evaluada nel ciclu 2022-2023 por cuenta de la normativa interna de la Unesco, qu’establez que cada añu namás s’evalúen 55 candidatures de les presentaes polos distintos países, con preferencia pa les naciones poco o nada representaes nuna Llista de Patrimoniu Mundial Inmaterial na qu’España cunta na actualidá yá con 20 elementos inscritos. Cada país tien derechu a qu’unu de los sos espedientes s’analice cada dos ciclos, poro la evaluación de la candidatura de la cultura sidrera va llevase a cabu finalmente nel ciclu 2023-2024.
