Un equipu investigador de la Universidá d’Uviéu diseñó un nuevu protocolu que pretende ayudar a entender los problemes qu’acusen les persones con dificultaes nel deprendizaxe por aciu l’analís de cómo deprienden. Ye un métodu novedosu pol so calter multimodal -rexistra variables psicofisiolóxiques, percepciones personales, emociones y comportamientos- y porque apurre evidencia del procesu de deprendizaxe de la persona enantes, mientres y dempués del mesmu. Esti enfoque va permitir que’l problema de cada persona pueda encetase de la manera más afayadiza. La investigación, espublizada na revista “JoVE: Journal of Visualized Experiments”, foi desenvuelta por Rebeca Cerezo, Estrella Fernández, Cristina Gómez, Miguel Sánchez-Santillán, de la Universidá d’Uviéu, y Michelle Taub y Roger Azevedo, de la University of Central Florida.
El métodu recurre, per un sitiu, a entrevistes y pruebes psicométriques, y, per otru, al analís de cómo interacciona’l deprendiz col ordenador. Asina, rexístrense les vegaes que calca col mur, en qué momentu y en qué orde, y grábense tolos movimientos oculares que fai, ónde s’afita, detiense, etc., gracies a un sistema d’infrarroxos. Amás, rexístrase la so respuesta psicogalvánica (conductancia llétrica de la pelleya) con un sensor de rexistru asitiáu nos deos d’una mano, pa ver en qué momentu o en qué tipu d’actividaes siente mayor ansiedá o estrés. Grábense tamién con una cámara les espresiones faciales que darréu van ser analizaes automáticamente pa conocer qué emociones son les predominantes mientres se tán faciendo les actividaes. A lo último, inclúyense cuestionarios d’autoinforme nos que, cada ciertu tiempu, pregúntase-y al suxetu qué ta pensando.
Too esto rexístrase por tiempos y acciones nuna gran base de datos y fáense analisis complexos qu’inclúin técniques estadístiques y de minería de datos, ya informen de cómo taba actuando la persona nun momentu determináu, o bien, qué pensó, sintió y fixo’l suxetu la mayor parte del tiempu. D’esta miente, puede sabese si la persona utiliza correchamente los recursos y estratexes que se ponen a la so disposición.
Les dificultaes de deprendizaxe suponen una esmolición xeneralizada nes sociedaes modernes, yá que tienen un gran impactu nel rendimientu académicu de les persones que les carecen, asina como nel profesional. Sicasí, a diferencia de niveles educativos previos, apenes esisten protocolos d’evaluación p’adultos con dificultaes de deprendizaxe, y los qu’hai disponibles, nun suelen tener en cuenta aspectos metacognitivos o d’autorregulación del deprendizaxe, nin suelen plantegase dende un enfoque d’evaluación multimodal.
