L’alderique sobre si l’edificiu de l’antigua Universidá Llaboral de Xixón debe ser Patrimoniu de la Humanidá ta enriba de la mesa. Y eso díes depués de que’l Plenu refugara la propuesta pa promover la so candidatura a entrar na llista de la UNESCO. La propuesta del PP cuntó col sofitu de Cs, Foru y Vox y foi refugada pola izquierda municipal. PSOE, Podemos-Equo ya Izquierda Xunida recordaron el pasáu franquista del edificiu.
Más allá del posicionamientu políticu de los grupos, la posibles candidatura de la Llaboral si cunta col sofitu de sectores ultraconservadores. Una concentración na plaza Mayor convocada por Asturias con la Bandera amosó’l so apoyu a la declaración de la Llaboral como Patrimoniu de la Humanidá. Tamién el rector de la Universidá d’Uviéu y otros colectivos sofitaron la propuesta.
L’últimu pasu foi el de l’alcaldesa de Xixón. Ana González Rodríguez rectificó esti sábadu y anunció una proposición del Grupu Municipal Socialista pal Plenu de marzu coles mires de que’l Gobiernu asturianu impulse la candidatura «ensin resalvar la hestoria». La rexidora reconoció que «nun supimos esplicar bien los nuesos argumentos» y por eso decidieron convertilos nuna proposición ensin omitir «munches verdaes».
González aseguró que «queremos a la Universidá Llaboral, nun nos avergoñemos d’ella y por eso nun puede negase la hestoria». Coles mesmes destacó que lo más grande de la Universidá Llaboral, más allá del so grandor arquitectónicu, ye la «resignificación que los socesivos gobiernu socialistes consiguieron da-y al complexu». «La memoria ye lo que nos fai fuertes nel presente y lo que nos convierte nuna sociedá democrática, llibre ya inclusiva», remató.
Y tu, ¿qué opines? ¿Ye @LaboralCdlC Patrimoniu de la Humanidá?
— Xixón al día (@xixonaldia) February 17, 2020
