La vicepresidenta del Gobiernu d’Asturies, Gimena Llamedo, visitó güei la nueva sala inmersiva del pozu Santa Bárbara, en Mieres, una actuación integrada nel Plan de Sostenibilidá Turística en Destín (PSTD) del Montaña Central que va dexar averar la historia minera d’Asturies al traviés de ferramientes dixitales innovadores. Mientres la visita, Llamedo destacó qu’esta iniciativa “vien contribuyir a tola ufierta vinculada a la historia de la minería” y dexa que los que la visiten puedan “sentir esa emoción” y conocer d’una forma diferente la trayectoria de los valles mineros asturianos.
Tamién sorrayó que’l proyectu facilita l’accesu a esti patrimoniu a persones que nun puen vivir otres esperiencies amestaes a la minería. “Ye una forma d’averar la historia d’Asturies y l’historia d’estos valles mineros a aquelles persones que nun puedan aportar a otres instalaciones o esperiencies. Equí puen averase a esa realidá y conocer la historia d’esti territoriu”, señaló. Al so xuiciu, l’actuación supón “un apueste que vien ameyorar la ufierta del Valle del Caudal y de la Montaña Central”, reforzando l’encantu de la contorna como destín turísticu.
La sala inmersiva forma parte d’un proyectu de soluciones dixitales pa la interpretación del patrimoniu qu’inclúi tamién esperiencies de realidá virtual, trabayos de fotogrametría 3D, la dixitalización de la oficina de turismu y percorríos interactivos pela ciudá. Llamedo enmarcó esta actuación na estratexa del gobiernu pa consolidar la denominada “naturaleza minera” como un productu turísticu estremáu y complementariu a otres iniciatives rellacionaes col cicloturismu y la gastronomía. “Tamos trabayando día ente día pa que cada vez seyan más los llugares escoyíos polos turistes y esti ye ún d’esos destinos que cada vez se ta convirtiendo en más encantu y xenera más actividá económica vinculada al turismu”, afirmó.
El Gobiernu d’Asturies movilizó hasta agora 920.908 euros de fondos europeos p’actuaciones turístiques en Mieres. Según esplicó la vicepresidenta, estes inversiones tán contribuyendo a diversificar la ufierta y a consolidar la crecedera turística de la contorna. Como exemplu, destacó que mientres el primer semestre del añu destináronse cerca de 30.000 euros a estancies na zona al traviés de los bonos de turismu rural. “Si echamos la vista atrás, va unos años sería casi impensable ver estos datos de crecedera turística. El trabayu conxuntu colos conceyos y les inversiones realizaes tán dexando que la Montaña Central gane protagonismu y encantu pa los que nos visiten”, concluyó.
