El salón de plenos del Conceyu de Cangas acoyó esta mañana la presentación de la XX Selmana Cultural de Cangas, que se va celebrar ente’l 21 y el 25 de marzu. Ente les propuestes plantegaes pa esta XX edición, atópase espectáculos poco habituales en zones rurales, col fin d’intentar averar esti tipu de cultura, más habitual nes ciudaes, a los vecinos y vecines del conceyu.
Una efeméride especial, na que se va percorrer les venti ediciones d’esta Selmana Cultural, cola esposición de los cartelos de toles ediciones, que realizó’l canguetu Ernesto García del Castillo Netuo, y que la so amuesa inaugurar el llunes 21 de marzu, a les 20 hores, na sala d’esposiciones de la Casa de Cultura ‘Palacio de Omaña’. Precisamente’l cartelu anunciador d’esta Selmana Cultural, obra de ‘Netu’, diose a conocer esta mañana, na que puede vese representada la Casa Consistorial y la plaza Conde Toreno, sol lema “20 años percorriendo la Cultura”.
El conciertu ‘Couleur Café Jazz Quartet’ va ser otru de los espectáculos que se va llevar a cabu’l martes 22 de marzu. Una formación clásica de jazz (pianu, contrabaxu, batería y voz), cola idea d’averar esti estilu de música al públicu polo xeneral por aciu versiones de temes de jazz y otros estilos, que nun perteneciendo a esti xéneru, tán íntimamente amestaos a él. Toles actuaciones van desenvolver nel Teatru Toreno a les 20 hores.
L’espectáculu teatral ‘El postreru qu’apague la lluz’ va faer cimblar cola risa de los cangueses el Teatru Toreno el próximu miércoles 23 de marzu. Esta obra de teatru ye una desternillante comedia escrita y empobinada por Antonio Ozores y protagonizada por Emma Ozores y Juan Anillo. Con un solu actu, nel que s’amuesen distintes maneres d’atraer al otru sexu.
‘Si fueren elles, un paséu pola hestoria del teatru musical’, ye otra de les propuestes que se van averar a Cangas el xueves 24 de marzu. Una actuación que van realizar cinco muyeres vasques que presenten, al traviés de la música, la interpretación y la danza, distintes temes musicales que van faer tararear y movese nes butaques al públicu, que se va emocionar coles sos melodíes y hestories.
El vienres 25 de marzu, pa poner el broche final a esta XX Selmana Cultural de Cangas, el tenor cangués Moisés Molín y la so esposa, la soprano mexicana Dolores Granaos, van allantar al públicu con una Zarzuela, acompañada al pianu por Manuel Valencia.
Les entraes a tolos espectáculos son de calter gratuitu y van poder acutar na Casa de Cultura ‘Palacio de Omaña’ o nel teléfonu 985.812.617, hasta completar aforu. va aplicase’l protocolu Covid establecíu nel momentu de l’actuación.
