Llaboral Centru d’Arte súmase a les celebraciones del Día Internacional del Llibru. L’equipamientu entama’l II Certame de Poesía: haikus visuales y un Cuarentecuentos pa públicu familiar. El certame, abiertu a persones de toles edaes, tien como oxetivu animar al públicu xeneral a familiarizase colos llinguaxes artísticos como forma d’espresión. Tamién, esplorar les conexones ente dos d’estos llinguaxes, la poesía y l’audiovisual y xenerar nueves audiencies pal arte, dende la participación activa. El concursu ta enmarcáu nuna llínea temática: el confinamientu deriváu del estáu d’alarma xeneráu pola crisis del COVID-19.
Un haiku, d’orixe xaponés, ye un poema curtiu, de 17 sílabas en versos ensin rima. Les persones participantes tendrán d’unviar un vídeu d’un máximu de 30 segundos nel qu’apaeza’l haiku, recitáu o escritu. Puen presentase propuestes en castellán o n’asturianu.
Un xuráu compuestu por persones del mundu de la cultura va escoyer el haiku ganador que va ser premiáu con 250 euros, un llote de publicaciones del Centru d’Arte y un carné d’Amigu de Llaboral. Puede consultase tola información y les bases completes en:
www.laboralcentrodearte.org.
Amás, tamién nel marcu del Día del Llibru, Llaboral convidó a Hipnótica teatru a preparar un Cuarentecuentos pal públicu infantil. Tres llargos viaxes na so escoba por tolos continentes, Minerflu, La Bruxa Maga escoyó dos formosos cuentos colos que vais poder suañar ya imaxinar, esfrutando de les enormes selves llenes d’animales exóticos y cielos inmensos por esquizar. El Cuarentecuentos tien una duración de 16 minutos. Ta empobináu pa persones d’a partir de 3 años y va poder vese na canal de facebook de Llaboral Centru d’Arte a partir del xueves 23 d’abril.
