LABoral Centru d’Arte reabre esti llunes

L'Archivu Históricu tamién recupera l'actividá'l llunes con un sistema de cita previa pa realizar consultes presenciales y solicitú vía telemática

0
109

Llaboral Centru d’Arte y l’Archivu Históricu d’Asturies reabren les sos puertes esti llunes. Complétense d’esta manera en dambos equipamientos l’aplicación de los protocolos de seguridá pa trabayadores y usuarios fixaos poles autoridaes sanitaries. Llaboral Centru d’Arte retoma les nueve residencies d’artistes de 2020, interrumpíes pol confinamientu, y acueye, amás, les ocho propuestes ganadores de la III convocatoria de Llaboral Impulsa, que van empecipiar les sos estancies nel centru cultural de manera inmediata.

Tamién va ampliar la beca de producción LABJoven Los Bragales, que va prescindir de la esposición del proyectu ganador en sala en cuenta de la producción de dos obres audiovisuales, de net.art o d’otros formatos emerxentes para redes sociales.

Como yá anunció la Conseyería de Cultura, Llaboral dexará l’espaciu Plat0 pa proyectos asturianos rellacionaos coles artes escéniques y musicales. Estes cesiones, con una duración máxima de dos selmanes, van facilitar l’accesu de los creadores y l’usu de los equipos ellí instalaos. La posibilidá de beneficase d’esta posibilidá va tar permanentemente abierta y les places van asignar por orde de llegada de los pidimientos.

Les actividaes espositives en Llaboral Centru d’Arte van volver a entamar en septiembre. Va ser cola amuesa europea Ecosistemas, qu’axunta una selección d’obres recién producíes pola European Media Art Platform. L’amuesa de Circuitos d’Artes Plástiques de la Comunidá de Madrid va celebrase n’ochobre y en payares esibiráse la esposición internacional sobro arte, neurociencia ya intelixencia artificial Cuando las mariposas del alma baten sus alas…. Esta amuesa cunta, amás, cola collaboración del Institutu de Neurociencia (Ineuropa) y el Centru d’Intelixencia Artificial de la Universidá d’Uviéu.

Les dos grandes esposiciones de Vaqueru Palacios y Años Luz, del colectivu Mécaniques Discursives, patrocinaes pola Fundación EdP, y que la so inauguración taba prevista pa mayu y xunu de 2020, van aplazase hasta l’añu próximu.

Llimitación d’aforu

Pela so parte, l’Arquivu Históricu d’Asturies tamién vuelve a entamar la so actividá de cara al públicu’l esti llunes. La consulta presencial va llevase a cabu por aciu cita previa, alcordada telefónicamente o al traviés del corréu electrónicu, por cuenta de la llimitación del aforu. Coles mesmes, podrá solicitase información documental y bibliográfica de manera telemática. Va dase prioridá a la unviada de la documentación per vía dixital. L’equipamientu suspende de manera temporal les actividaes d’espardimientu cultural, por exemplu esposiciones y visites guiaes.