El llar de l’Academia de la Llingua Asturiana, nel númberu 10 de la cai L’Águila d’Uviéu, va ser l’escenariu d’un de los alcuentros d’edición de Wikipedia n’asturianu qu’entama Wikimedia España. L’actividá, coordinada por Víctor Suárez y que va desendolcase ente les 4 y les 7 de la tarde d’esti xueves 4 de payares, tien dos partes principales.
D’un llau, una esposición sobre qué ye la Wikipedia y cómo s’edita nella y, d’otru, una edición de conteníos rellacionaos cola llingua asturiana dientro del proyeutu, lo qu’inclúi la creación y l’ameyoramientu d’artículos y tamién la xubida d’imáxenes a Wikimedia Commons pal so usu na Wikipedia.
Esti «editatón» (maratón d’edición o xera na que delles persones se xunten col oxetivu de crear conteníu nuevo en Wikipedia) inxértase nuna riestra d’actividaes que Wikimedia España ta faciendo estes selmanes n’Asturies en collaboración cola Direición Xeneral de Gobernanza Pública, Tresparencia, Participación Ciudadana y Axenda 2030.
Les persones interesaes en participar han unviar un corréu electrónicu a info@wikimedia.es.
