L’aguamala (Physalia physalys) ye una especie colonial d’hidrozoos sifonóforos. Alita davezu na mar abierta d’agües cálides asina como na corriente del Golfu atlántica. La so picadura ye peligrosa y perdolorosa. Ye un organismu colonial con individuos especializaos pa caltener la colonia viva. Los hidroides divídense’l trabayu. La vela, una vexiga enllena de gas de color azul, pa flotar, los gastrozoides pa dixerir, los castilozoides pa caza y defensa y los gonozoides pa la reproducción.
Tien una vela xelatinosa d’hasta 30 cm. pa percorrer l’océanu col vientu. Del cuerpu central colinguen los tentáculos d’hasta mediu metru, con cnidocitos que puen paralizar a un pexe grande y ferir de gravedá al ser humanu coles sos toxines. Los tentáculos puen endolcar a les preses y meteles na boca pa dixeriles. Nes fasteres avezaes poles aguamales, puen ser depredaes por tortugues marines, pulpos, llimiagos de mar y pexes rueda.
Pola mor del cambéu climáticu, col calentamientu gradual de les agües costeres, cada branu avérense más cantidaes d’aguamales a la mar Cantábrica, provocando incidentes y el piesllu de sableres al bañu. Les sos picadures y agüeyamientos n’Asturies ficieron intervenciones sanitaries y de vixilancia de salvamentu, llantando banderes bermeyes xunto a la blanca col dibuxu de dos aguamales n’abondes sableres del país, nes que se recoyeron decenes d’elles.
Nel home, el velenu tiene efeutos neurotóxicos, citotóxicos, cardiotóxicos, con dolor mui intensu ya inclusive la muerte. Si piquen, siéntese una quemazón, hai que llavase bien con agua marina ensin cincalo coles manes, avisar al serviciu de salvamentu pal so tratamientu médicu. El mundiu carez un cambéu al qu’hai qu’avezase, tanto nes tierres como nes mares. Magar que ye tan rápidu que la nuesa especie nun seya quien a ello.
