L’Academia de la Llingua Asturiana fixo güei públicu un comunicáu nel que amuesa’l so sofitu a los artistes atacaos pola censura llingüística qu’un conceyal de VOX llanzó nos pasaos díes, declarando que evitaría contratar a artistes qu’usaren l’asturianu.
Esti ye’l comunicáu qu s’emitió dende la institución:
L’Academia de la Llingua Asturiana (ALLA), nel so llabor estatutariu de curiáu de los derechos llingüísticos, quier manifestar el so enfotu na respuesta firme y tranquila de la ciudadanía y de los axentes más direutamente afeutaos poles amenaces del radicalismu políticu, persabiendo que, gracies a la madurez algamada nel procesu de normalización llingüística, nun van dase arrenuncios individuales nin coleutivos nel usu cotidianu y artísticu del idioma.
Arriendes d’esto y con tola claridá, l’ALLA:
- Enfótase na intensidá del puxu democráticu na sociedá asturiana.
- Refuga dafechu cualesquier intentu de censura o prohibición de les manifestaciones culturales públiques n’asturianu y de toa estratexa dirixida a menguar l’usu de la nuesa llingua.
- Demanda, nesti sen y solemnemente, el cumplimientu de la Declaración Universal de los Derechos Humanos, de la Constitución Española, de la Carta Europea de les Llingües Minoritaries, del Estatutu d’Autonomía y de la Llei d’Usu y Promoción del asturianu.
- Esixe a les instituciones públiques una garantía de “cero cesiones” y toles prevenciones executives nel cumplimientu específicu, de mou especial nos conceyos, de los mandaos llegales en materia llingüística.
- Sofita a toles y tolos artistes que tienen al asturianu como llingua normal del so facer y como espresión de la so llibertá creativa.
- Ufre les instalaciones de l’ALLA y el so sofitu a esti coleutivu artísticu pa desendolcar cualesquier aición defensiva en rellación con estos ataques (comunicaos a la opinión pública, presentación de manifiestos, ruedes de prensa, etc.)
