El Conseyu de Gobiernu dio lluz verde esta selmana a un gastu de 5.647.706 euros pa entainar la llicitación del aparcamientu disuasoriu de l’avenida de Portugal, en Xixón. El proyectu casi va doblar la capacidá actual de la parcela, con un total de 486 places distribuyíes en dos plantes. El plan recueye les aportaciones de los colectivos vecinales de la zona y la estimación ye que les obres enllárguense mientres 15 meses.
El diseñu del proyectu inclúi idees novedoses como la inclusión de seis patios interiores con vexetación, p’apurrir lluz y ventilación a la planta semisuétanu y naturalizar l’espaciu. La urbanización del pisu cimeru descubiertu, al nivel de l’avenida de Portugal, inclúi una zona verde con espacios d’usu públicu, que da continuidá a la esistente al otru llau de la cai y dixebra’l parking d’edificios residenciales colindantes.
L’actuación enmárcase ente les midíes pa tresformar la movilidá nes redolaes metropolitanes recoyíes na Estratexa de Movilidá Sostenible, que busca coordinar la planificación urbanística cola ufierta de tresporte públicu, amenorgar los desplazamientos en vehículu priváu y fomentar l’usu de los medios públicos.
L’aparcamientu de l’avenida de Portugal va dexar absorber los fluxos de tráficu que xeneren na zona servicios como los xulgaos, la comisaría de policía o la futura estación intermodal, toos ellos centros d’actividá con un movimientu intensu de públicu.
Accesibilidá y puntos de recarga eléctricos
El nuevu aparcamientu va allugase al pie de la glorieta de finalización de l’autopista GJ-81, nel accesu sur a la ciudá, y va aumentar les 275 places qu’ufierta anguaño la parcela hasta 486. El parking va ocupar una superficie total averada de 7.300 metros cuadraos y va tener dos plantes: una en semisúetanu y otra en planta cubierta que coincide cola rasante del terrén actual.
La planta cubierta va cuntar con 230 places, diez d’elles afeches pa persones con movilidá amenorgada y otres 26 con puntos de recarga pa vehículos llétricos. Na planta semisótano van allugase los 256 estacionamientos restantes. Toles places afeches dispunxéronse en planta cubierta, abargana del accesu, y con salida directa y próxima a la cai. La planta semisótano va cuntar con un accesu por ascensor dende l’avenida de Portugal, col fin de garantizar la so plena accesibilidá.
Les entraes al nuevu equipamientu van asitiar na avenida de Portugal, nel casu de la planta cubierta, y en Sanz Crespo, pa la planta semisótano. Dambes hanse diseñáu alliniaes cola rampla interior del aparcamientu pa facilitar la entrada y salida directa y evitar circulaciones innecesaries pel interior del parking.
