– Más de mil usuarios descarguen l’aplicación cada selmana y cerca de 26.000 persones tiénenla disponible nos sos móviles.
– El Sespa recuerda que pa acceder a toles prestaciones precísase disponer de la clave permanente que se facilita nos servicios d’atención al ciudadanu de los hospitales públicos.

El Serviciu de Salú del Principáu (Sespa) amplió les prestaciones de l’aplicación móvil de MiAsturSalud y dende güei yá puede retirase la medicación nes oficines de farmacia ensin necesidá de presentar la tarxeta sanitaria, al xenerar un códigu de barres que descodifiquen los llectores de les botiques. Amás la ferramienta dexa descargar la fueya de tratamientu nel mesmu formatu que l’impresu en papel nel centru de salú.

Per otra parte, implementóse un nuevu módulu de citación para xestionar les consultes colos profesionales del equipu d’atención primaria, que fai posible les cites previes de manera directa y axilosa. Coles mesmes la nueva aplicación dexa acomuñar tarxetes sanitaries de familiares para xestionar les sos cites d’atención primaria.

El Sespa sigue avanzando nel procesu de dixitalización para ameyorar l’accesibilidá de la ciudadanía al traviés de los teléfonos móviles operaos con Android ya iOS para la tramitación de cites y recetes electróniques, consultes de pruebes ya informes clínicos de los postreros cinco años, d’una manera directa, cenciella, eficiente y segura. Tamién puede consultase la hestoria clínica dixital del Sistema Nacional de Salú (SNS).

El sistema amás de facilitar la comunicación ente la ciudadanía y los profesionales de los equipos d’atención primaria y del hospital de referencia, aforra tiempu y desplazamientos a los usuarios y ayuda a descargar de burocracia a los profesionales.

Desque s’enllantó esta ferramienta dixital a finales del añu pasáu, unos 26.000 usuarios descargaron l’aplicación nos sos teléfonos móviles. Cada selmana prodúcense más de mil descargues d’esta app. La mayoría de los usuarios de l’aplicación (8 de cada 10) utilicen la clave permanente, y el restu’l númberu de tarxeta sanitaria p’aportar a esta carpeta ciudadana del Serviciu de Salú. Hasta mediaos de febreru realizáronse más de 225.000 operaciones ente pidimientu de cites, consulta de medicación y d’informes.

El Principáu invirtió 892.238 euros, cofinanciaos con fondos europeos Feder, nesta ferramienta, qu’avanza na dixitalización del sistema sanitariu públicu.