L’área sanitaria III, con cabecera n’Avilés, llogró’l sellu internacional d’excelencia en cuidaos d’enfermería poles sos bones práctiques na prevención de mancadures por presión y cayíes y nel manexu de los accesos venosos. El reconocimientu va entregase’l 21 d’abril nel Hospital Universitariu de San Agustín (HUSA).
Trátase de la primer área sanitaria d’Asturies acreditada pol centru coordinador rexonal BPSO (acrónimu del inglés Best Practice Spotlight Organizations), en collaboración cola Unidá d’Investigación en Cuidaos de Salú (Investén-ISCIII) del Institutu Carlos III. Primeramente, cuntaba con esti reconocimientu internacional, creáu pola Asociación Profesional d’Enfermeres de Ontario (RNAO), l’Hospital Valle del Nalón.
La área sanitaria III llogró la certificación en cumpliendo, los últimos trés años, los oxetivos establecíos nel marcu del Programa BPSO. En 2024 va ratificase esta distinción si caltién la excelencia nos cuidaos.
Igualmente, el centru coordinador nacional va tresferir el BPSO Hospital Valle del Nalón al centru rexonal pa la so xestión directa. Nesti centru trabayen con bones práctiques en cuidaos rellacionaos col manexu de los accesos venosos, la prevención de cayíes, el fomentu de la llactancia materna y el so caltenimientu al llargu plazu.
Per otra parte, les árees sanitaries I (con cabecera en Xarrio) y IV (Uviéu) empecipiaron el procesu pa incorporase a la rede BPSO autonómica. Nel casu de Xarrio, van ponese bones práctiques na prevención de mancadures por presión y cayíes y curiaos de persones ostomizaes, ente que nel área d’Uviéu va fomentase la lactancia materna y el so caltenimientu al llargu plazu, amás de la prevención de cayíes y del comportamientu suicida.
El programa de bones práctiques en cuidaos, promovíu pola Unidá d’Investigación en Cuidaos de Salú (Investén-ISCIII), el Centru Español pa los Cuidaos de Salú Basaos na Evidencia – del que forma parte Asturies- y l’Asociación Profesional d’Enfermeres de Ontario (RNAO), tien por oxetu fomentar, facilitar y sofitar la implantación, evaluación y caltenimientu de bones práctiques en cuidaos d’enfermería.
Esti sellu de calidá ta establecíu en más de 50 países, lo que dexa collaborar, analizar y comparar los resultaos de les sos acciones con centros nacionales ya internacionales d’otros sistemes sanitarios.
