L’Ayuntamientu de Xixón empecipia mañana la reforma de los edificios del parque d’Isabel la Católica. Los trabayos van empezar poles oficines y vestuarios, y van siguir poles edificaciones del lazaretu, l’almacén, el palombar, la paxarera y la pérgola.
Estos trabayos fueron axudicaos a Ovinorte S.L. por 158.510 euros y un plazu d’execución de seis meses dende’l día 14 de xineru, fecha en que se dio la firma de l’acta de replantegu.
Esta actuación súmase a les yá executaes nel parque d’Isabel la Católica como son la reposición de les barandielles de madera, la reposición de material vexetal y aceru corten y el destoconáu. Tamién se realizaron meyores na xardinería al traviés del Plan d’Empléu local 2021-2022. Coles mesmes, dende la conceyalía d’Obres Públiques, tase licitando la meyora del zarru del parque infantil de tráficu y ta en procesu de redacción el proyectu de renovación de los xuegos infantiles.
En total, nesti últimu añu invirtiéronse nel parque d’Isabel la Católica más de 460.000 euros. Quepe recordar, amás, que la restauración de les sos llagunes forma parte del proyectu para’l tresformamientu del ecosistema urbanu de la ciudá ‘Xixón Ecoresiliente’ que’l Conceyu presentó a la convocatoria de fondos europeos Next Generation.
