León Benavente va ser la banda qu’encabece’l cartel de VESU 2025. Pela primer vez nun festival n’Asturies, el grupu va presentar en directo l’álbum postreru, Nueva sinfonía sobre el caos. Un trabayu curtiu y directu, con cantares clásicos n’estructura pero valientes y arriesgaos na forma, poderosos y baillables, hedonistes y, al tiempu, reflexivos. Un conxuntu de voces ya instrumentos, ritmos y testures que representen pa León Benavente la sinfonía d’un tiempu nuevu onde abulta que vivir rápido ye la única solución a una constante incógnita.
El festival de música independiente que patrocina la Fundación Municipal de Cultura del Ayuntamientu d’Uviéu y el conceyu de La Ribera y que se va celebrar del 20 al 22 de xunu tamién sumó al cartel el proyectu nuevu del que fuera líder de Desakato, Pablo Senator. El cantante asturianu ta acabante d’espublizar un discu pop producíu por Manuel Cabezalí (Havalina) y Víctor Cabezuelo (Rufus T. Firefly), que tamién faen parte de la banda en directo xunto a Sil Fernández y Adrián Sheriff.
Jesús Suárez, más conocíu na escena como Delgao, dio nos años postreros nún de los referentes de la música urbana española. Esti cantante, compositor y productor que collabora davezu con María Escarmiento, ta acabante presentar «Tengo Fe», l’adelantu del trabayu discográficu viniente.
Dende Portugal van debutar n’Asturies Bateu Matou, un tríu de músicos y productores que fusionen los raigaños lusos cola música contemporánea. Ellos son los autores de Não Pára, l’himnu oficial de la lliga portuguesa de fútbol. Nacen nel entornu rural de la Siberia Estremeña pa dar nún de los fenómenos musicales del país. Influenciaos por Extremoduro, Estopa o Nirvana, Sanguijuelas del Guadiana son un regresu a los raigaños, un apueste pola autenticidá y el compromisu que van dar muncho que falar.
El mecigayu de música y skate tien como resultáu al dúu xerezanu Nadie Patín. Un soplu d’aire fresco na escena musical nueva, la combinación perfecta de guitarrazos afilaos y lletres directes al corazón, de descaru y tenrura, que nun son a dexar a naide indiferente.
Súmense a les ya confirmaes Porridge Radio, Queralt Lahoz, Los Punsetes, Neura y Ana Lua Caiano. Nesta nueva edición, VESU va volver a cuntar col sofitu de Vibra Mahou, la plataforma de música que puxa poles experiencies Cinco Estrelles al rodiu’l directu, como esti festival que marca l’entamu del branu y que ya ta consolidáu como referente n’Asturies.
