La novena edición del Premiu Nel Amaro de Teatru Profesional n’asturianu convocáu pola Conseyería de Cultura, Política Llingüística y Deporte yá tien finalistes. Les obres presentaes poles compañíes É Vero Teatro, Covenant Producciones, Nun Tris y Higiénico Papel son les cuatro que pasaron a la final d’esti gallardón y, polo tanto, les que se van exhibir los cuatro primeros vienres d’ochobre nel Teatru Filarmónica d’Uviéu, con entrada llibre y gratuita hasta enllenar aforu.
Esti gallardón, con una dotación económica de 6.000 euros, tien como oxetivu ayudar a la profesionalización de la industria cultural asturiana, sobre manera del sector de les artes escéniques, premiando la meyor obra en llingua asturiana o eonaviegu d’alcuerdu con criterios de calidá escénica, lliteraria y llingüística.
El xuráu encargáu de valorar los montaxes presentaos y facer la selección de los cuatro finalistes d’esta edición tuvo presidíu pol director xeneral d’Acción Cultural y Normalización Llingüística, Antón García. Como vocales, participaron l’actriz y filóloga María Cotiello, la profesora y autora teatral Azucena Álvarez, l’escritor y profesor Xuan Santori, l’escritor y director Sergio Buelga, y l’actriz y crítica teatral Eva Vallines.
Les propuestes de les compañíes asturianes finalistes nesta edición del Premio Nel Amaro son estes:
- Al rodiu l’horru, d’É Vero Teatro.
- Tía Miseria, de Covenant Producciones.
- Vuelu d’andarines / Viaxe d’andolías, de Producciones Nun Tris.
- 1001. Una odisea nel desiertu, d’Higiénico Papel Teatro.
Depués d’esta primer fase, va facese’l IX Festival Nel Amaro de Teatru Profesional en Llingua Asturiana, que se va celebrar nel Teatru Filarmónica d’Uviéu tolos vienres del mes d’ochobre. Amás de les cuatro pieces teatrales finalistes, súmase a esti festival la obra ganadora na edición del 2024, Perendi, de La Compañía del Alba.
Nel festival mentáu va decidise la obra teatral vencedora que, amás de la dotación económica del premiu, va integrase nel circuitu Autores nel Camín del programa Asturies, Cultura en Rede.
El premiu y el festival lleven el nome del autor turonés Nel Amaro (1946-2011), consideráu una referencia fundamental na vanguardia teatral n’asturianu. Nel Amaro foi amás l’autor al que se dedicó la edición de la Selmana de les Lletres Asturianes nel 2021.
