El Conseyu de la Mocedá de Xixón va anovar el próximu 19 de xineru la so comisión permanente tres un revesosu procesu electoral y ensin unanimidá. La única candidatura presentada foi la encabezada por Yurena Sabio, candidata númberu 8 de Convocatoria por Xixón (IX, Más País y IAS) nes pasaes elecciones municipales; que va recoyer el testigu de la presidenta saliente, Aridane Cuevas, candidata númberu 18 de Convocatoria por Xixón (IX, Más País y IAS) nes pasaes elecciones municipales.
El proyectu qu’Izquierda Xunida ufierta pa CMX va ser, según les Mocedaes Socialistes «previsiblemente continuista» y nes palabres d’IX “queremos dar relevu al trabayu que se lleva desempeñando toos estos años, con delles propuestes que van siguir la mesma llinia”.
Cuando dicen esto, cinxir a raxatabla a la lliteralidá de la espresión “mesma llinia”, una y bones la propuesta que ponen a disposición de les entidaes «nun contien nin una sola propuesta distinta a lo que yá se punxo en marcha, sacantes la creación d’un exiguu grupu de mediu ambiente y la creación d’un grupu de participación internu onde van poder tar toles asociaciones miembru del CMX, como si eso nun fuera yá la mesma Asamblea», argumenten les Mocedaes Socialistes.
Dende Mocedaes Socialistes de Xixón, creen qu’una entidá tan importante pa la participación xuvenil nun puede ser tan pocu ambiciosa nes sos propuestes nin nos sos oxetivos, yá que remana una bona suma de dinero público de tolos y toles xixoneses.
Amás, dende Mocedaes valoren negativamente’l procesu pol cual anovóse la comisión permanente. De primeres, «la falta de tresparencia cola que se remanó la candidatura oficialista que permaneció nel anonimatu y ensin querer falar col restu d’entidaes hasta’l día 15 de xineru, últimu día pa unviar candidatures», y de segundes, «la interesada eventualidá de que les delegaciones con derechu a votu puedan unviase hasta’l día 17 de xineru, tiempu abondu si fuera necesariu convocar “amigos y familia” a la votación del día 19».
Mocedaes destacó una “política non escrita” esistente nel CMX, que proscribe les candidatures encabezaes por entidaes polítiques, conducta que vien siendo orgullosamente
aplicada dende la presidencia d’Álvaro Granda, candidatu númberu 5 de Convocatoria por Xixón (IX, Más País y IAS) nes pasaes elecciones municipales, por delles asociaciones pantalla, o inclusive dende dómines anteriores cuando’l presidente yera Javier Suárez Llana, actual voceru de Convocatoria por Xixón (IX, Más País y IAS).
