La Conseyería de Cultura, Política Llingüística y Deporte encargó al escritor, poeta y traductor asturianu Martín López-Vega la coordinación de la Selmana de les Lletres Asturianes 2027, una edición que va tar dedicada dafechu a la memoria y al legáu de Xuan Bello, autor, ente otres, de Hestoria universal de Paniceiros, una de les obres más influyentes de la lliteratura asturiana contemporánea.
La designación de Martín López-Vega asitia al frente d’esta conmemoración a una de les figures asturianes con mayor proyección cultural y lliteraria internacional. Nacíu en Po (Llanes) en 1975, ye llicenciáu en Filoloxía Española pola Universidá d’Uviéu y doctor en Lliteratura pola Universidá de Iowa. A lo llargo de la so trayectoria desenvolvió un llabor destacáu como poeta, ensayista, traductor, críticu lliterariu y xestor cultural, consolidándose como una de les voces más reconocíes de la lliteratura asturiana contemporánea tanto n’asturianu como en castellanu. Amás, ye l’albacea lliterariu de Xuan Bello, responsabilidá que-y foi confiada pola so esposa y la so fía.
Autor d’una amplia obra poética y ensayística, Martín López-Vega publicó títulos como Les coraes de la roca, Gótico cantábrico: poemas 2013-2017 o Ábrete, Sésamo: poemas nuevos y escogidos (1994-2024), amás de desenvolver una actividá intensa como traductor y articulista cultural. La so obra foi reconocida con dellos premios lliterarios y traducida a delles llingües, combinando una mirada fondamente vinculada a Asturies con una marcada vocación cosmopolita y europea.
Amás de la so trayectoria lliteraria, ocupó responsabilidaes nel Institutu Cervantes, onde foi director de Cultura n’España, director del gabinete de dirección y anguaño dirixe la sede de Mánchester.
Tres del fallecimientu de Xuan Bello, el Principáu anunció nel 2025 la dedicación de tol añu 2027 a la memoria y al legáu cultural del escritor de Paniceiros, nuna programación especial que va tener como exa central la celebración de la Selmana de les Lletres Asturianes. Nesi momentu, la conseyera de Cultura, Política Llingüística y Deporte, Vanessa Gutiérrez, destacó que nun se trata namás de dedica-y el día o la Selmana de les Lletres, sinón d’articular una programación anual que ponga en valor la so obra, el so pensamientu y el so papel como creador y dinamizador cultural.
L’homenaxe a la so figura va incluyir actividaes lliteraries, alcuentros, esposiciones, publicaciones especiales y delles iniciatives de divulgación destinaes a averar la obra, el pensamientu y la dimensión universal del autor a xeneraciones nueves de llectores, amás de reivindicar la so contribución decisiva a la dignificación y espardimientu de la lliteratura en llingua asturiana. Ente les acciones previstes figura tamién el reconocimientu institucional de la so figura cola denominación del IES La Florida col nome de Xuan Bello a partir del cursu próximu.
Xuan Bello, un escritor universal
Nacíu en Paniceiros, nel conceyu de Tinéu, en 1965, Xuan Bello ta consideráu una de les figures esenciales de la lliteratura asturiana contemporánea y ún de los autores que mayor promoción nacional y internacional dio a la creación lliteraria en llingua asturiana. Poeta, narrador, ensayista, traductor y articulista, desenvolvió una obra fondamente vinculada a la memoria, al territoriu, a la identidá y al poder evocador de la lliteratura como espaciu de resistencia cultural y emocional.
Con apenes dieciséis años publicó’l so primer poemariu, Nel cuartu mariellu, iniciando una trayectoria lliteraria qu’acabaría convirtiéndolo nuna de les voces más reconocibles del denomináu Surdimientu, el movimientu de recuperación y modernización de la lliteratura asturiana surdíu a partir de los años setenta y ochenta. La so obra poética, caracterizada por una gran sensibilidá llírica y una mirada fondamente humanista, siguió con títulos como El llibru de les cenices, Los nomes de la tierra, El llibru vieyu o Los caminos secretos.
Sicasí, diba ser con Hestoria universal de Paniceiros, publicada orixinalmente n’asturianu y depués traducida pol propiu autor al castellanu como Historia universal de Paniceiros, cuando Xuan Bello algamaría una reconocencia estraordinaria dientro de la lliteratura española contemporánea. La obra, gallardonada col Premiu «Ramón Gómez de la Serna» nel 2003, convirtió’l pequeñu universu rural de Paniceiros nun territoriu lliterariu universal, onde convivíen la tradición oral, la memoria familiar, la imaxinación, la cultura europea y les grandes preguntes sobre’l tiempu, la pérdida y la identidá.
Al traviés d’una escritura fragmentaria y fondamente personal, Xuan Bello consiguió construyir una de les propuestes narratives más orixinales de la lliteratura española de les últimes décades, demostrando que la lliteratura n’asturianu podía dialogar d’igual a igual con cualquier tradición europea contemporánea. La crítica destacó sobre manera la so capacidá pa tresformar lo local n’universal y p’asitiar la llingua asturiana n’espacios de prestixu lliterariu hasta entós inéditos.
Amás de la so producción lliteraria, desenvolvió una intensa actividá cultural como traductor, periodista y dinamizador de la cultura asturiana. Tradució al asturianu autores como Fernando Pessoa, Robert Louis Stevenson o Arthur Conan Doyle, collaboró en numberosos medios de comunicación y revistes culturales y foi director del selmanariu Les Noticies. Tamién participó activamente en proyectos editoriales y n’iniciatives fundamentales pal afitamientu de la lliteratura asturiana contemporánea.
Nel 2017 recibió’l primer Premiu Nacional de Lliteratura Asturiana concedíu pola Academia de la Llingua Asturiana, que destacó especialmente la so contribución a asitiar la lliteratura asturiana «nel mapa de la lliteratura nacional e internacional».
El fallecimientu de Xuan Bello en xunetu del 2025 supunxo una conmoción enorme pa la cultura asturiana y provocó un ampliu reconocimientu institucional, social y lliterariu a quien yá yera consideráu en vida ún de los grandes referentes culturales del país. La dedicación de la Selmana de les Lletres Asturianes 2027 y la estensión de les actividaes a tol añu busca precisamente reivindicar la dimensión universal de la so obra, averar el so legáu a xeneraciones nueves y reconocer la so contribución decisiva a la dignificación y modernización de la lliteratura asturiana.
