La Conseyería de Cultura, Política Llingüística y Turismu amplió la nómina de les fiestes y actividaes d’interés turísticu del Principáu depués de dar el preste a les solicitúes del Concursu de Saltos Internacional Oficial de Xixón (CSIO), la Travesía Internacional de la Costa Naviega, el festival gastronómicu Su excelencia la fabada y el Certame del Quesu Casín.

El Conseyu Asesor de Turismu considera acreitaos los requisitos necesarios pa qu’estos cuatro eventos pasen a formar parte del llistáu de les fiestes d’interés turísticu rexonal pola so orixinalidá, tradición popular, valor sociocultural, antigüedá, capacidá d’atracción o celebración en fecha periódica. Toos ellos rescamplen pola calidá de la so organización y pola capacidad p’atraer visitantes.

El Concursu de Saltos Internacional Oficial de Xixón evolucionó nos sos 76 años d’existencia hasta convertise nún de los acontecimientos hípicos más prestixosos a nivel nacional e internacional. El CSIO axunta n’agostu a miles d’aficionaos alredor de la competición y de la so vertiente social.

La Travesía Internacional de la Costa Naviega ye un referente nel mundu del senderismu. Alredor d’esta marcha deportiva, que se celebra dende 1988, la organización fue incorporando una serie d’actividaes lúdiques y culturales qu’atraen a miles de participantes y visitantes d’otres comunidaes y de países como Arxentina, Méxicu o Portugal.

El Certame del Quesu Casín expón dende 2015 toles variedaes d’esti productu artesanu, que tien un procesu d’ellaboración tan llargu y complexu que lu fai un quesu especialmente atractivu. La cita fue ganando asistentes nes seis ediciones celebraes hasta agora y inclúi, amás d’esposición y venta, talleres d’ellaboración, concursos de cocina casina, talleres d’artesanía y actuaciones de grupos folclóricos.

La fiesta Su excelencia la fabada celébrase dende hai 40 años en La Felguera y busca potenciar el mantenimientu de la tradición popular y la cooperación na organización. El reconocimientu y la collaboración de los restaurantes de la zona, que participen casi na so totalidá, afirmen l’atractivu d’esta fiesta, que creció de manera bultable colos años.

Depués d’estes cuatro incorporaciones, anguaño esisten n’Asturies 67 fiestes declaraes d’Interés turísticu. La primer d’elles foi la celebración de La Madalena, de Llanes, que recibió’l distintivu en 1991.