L’IES Mata Xove, distinguíu pola so promoción del francés

La conseyera Carmen Suárez entrega’l reconocimientu y destaca la implicación, compromisu y dedicación del profesoráu

0
110

L’institutu Mata Xove ta acabante de ser reconocíu pola so promoción del francés. La conseyera d’Educación, Carmen Suárez, apurrió esti llunes el sellu LabelFrancÉducation. Ye un reconocientu que l’Axencia d’Enseñanza del Francés nel Estranxeru (AEFE) concede a los centros d’enseñanza que participen nel espardimientu de la llingua y la cultura franceses.

Un total de 66 centros docentes llograron n’España’l sellu LabelFrancÉducation: 16 d’educación primaria y 50 de secundaria (ESO y Bachilleratu). N’Asturies el IES Mata Xove ye’l primer centru docente que llogra esa reconocencia pola implicación, el compromisu y la dedicación de los equipos docentes. Esti institutu empezó col programa billingüe de francés nel añu académicu 2011-2012, pa convertise nun programa plurilingüe d’inglés y francés nel cursu 2016-2017. Anguaño ye ún de los siete centros plurilingües que pertenecen a la rede de 226 programes billingües d’Asturies. Amás, cuenta col sellu de centru eTwinning, una iniciativa europea dirixida a establecer hermanamientos ente centros escolares de distintos países cola cuenta de desenvolver proyectos de collaboración sobre cualquier tema del ámbitu escolar alcordáu polos participantes. Pa llevar a cabu los distintos proyectos utilícense ferramientes colaborativas disponibles n’internet.