L’izáu del viaductu de Pinzales retrásase hasta’l llunes

0
614

Los trabayos d’izáu del viaductu de Pinzales de les obres d’accesu a la Zalia retrásense hasta la próxima selmana por cuenta de causes técniques. La Conseyería d’Infraestructures va informar del horariu de la regulación del tráficu na carretera AS-326, al altor del viaductu de Serín, antes del empiezu de la obra. Mientres seis hores namás se va poder circular nun únicu carril.

La estructura del viaductu va tener 370 metros de llargor distribuyíos n’ocho vanos y va salvar el ríu Pinzales, la carretera AS-326 y la llinia de Feve, amás d’otres infraestructures industriales. El xueves va procedese al montaxe del segundu vanu, pa lo que se precisa llimitar la circulación na AS-326 cola mira de disponer del espaciu necesariu pal allugamientu de les grúes de gran tonelaxe que van efectuar la maniobra.

El viaductu, en curva, que va tener más de 20 metros d’altor y tipoloxía mista de vigues caxón d’aceru corten y llosa superior de formigón armao, ye’l mayor retu técnicu de les obres previstes. Les vigues presenten una configuración de cantu variable y algamen un altor d’ente 1,02 y 3,27 metros.

Esta obra, con un llargor de 3,7 kilómetros, forma parte del proyectu de construcción de los accesos a la Zalia. La Conseyería d’Infraestructures axudicó los trabayos en xunetu del 2017, con un presupuestu de 15.966.420 euros, de los cuales executáronse yá 5,3 millones, un 31 %.