El patronatu de la Fundación Llaboral Centru d’Arte, Creación Industrial y Promoción Cultural aprobó güei les bases que van rexir la convocatoria del puestu de dirección de LLABoral Centru d’Arte y Creación Industrial. La convocatoria va publicase nes selmanes vinientes cola mira de que LLABoral pueda cuntar con una dirección nueva d’equí a poco.
Les bases aprobaes fundaméntense nes que regularon l’anterior procesu selectivu pa la dirección del centru. Pa definiles, cuntóse col asesoramientu y les aportaciones de la comisión científica de la institución. Esta comisión va volver tener un papel determinante y preponderante nel procedimientu que se va abrir pa escoyer un director o directora nueva de LLABoral Centru d’Arte y Creación Industrial.
El procesu selectivu va constar de trés fases. Na primera, les persones aspirantes van tener que presentar el so currículum y los méritos rellacionaos coles funciones del puestu directivu (artístiques y de xestión). D’esta fase de valoración de méritos van salir un máximu de 15 candidatures, que van tener qu’ellaborar un proyectu d’análisis de les xeres del puestu y de propuestes pa desempeñales meyor, amás d’oxetivos y acciones concretes nel ámbitu de los conteníos y dirección artística de la institución. La última fase del procesu va consistir nuna entrevista d’evaluación y defensa del proyectu.
El procesu va tar dirixíu por un xuráu compuestu por dos miembros del patronatu de la fundación, trés integrantes de la comisión científica, una persona del ámbitu artísticu y cultural propuesta pola comisión científica y un secretariu con voz, pero ensin votu. De la mesma manera, alcordóse echar a andar el procesu de modificación de los estatutos de la fundación, que se confía en que se vea rematáu d’equí a pocu tiempu.
