Llaboral Centru d’Arte y Creación publicó les bases de la convocatoria de la beca LABxoven_Esperimenta 2022, unu de los programes de producción con más raigañu nel centru d’arte, que yá dio la oportunidá a artistes emerxentes, de la redolada más cercana, d’utilizar l’equipamientu y los sos recursos como plataforma pa realizar y espublizar proyectos artísticos.
L’oxetivu d’esta convocatoria añal ye otorgar una beca pa la execución d’un proyectu artísticu que cavilgue de forma amplia sobro los retos contemporaneos y la so relación cola tecnoloxía. El proyectu ha ser concebíu específicamente pa la so exhibición en Llaboral Centru d’Arte y Creación Industrial, y ta dirixíu a artistes que la so edá nun supere los 40 años a 31 d’avientu de 2022.
La dotación económica de la beca xube a 7.500 euros: 2.500 en conceutu d’honorarios de producción y cesión y 5.000 pa gastos de producción. Amás, los y les artistes van disponer d’un espaciu de trabayu, accesu a tolos recursos técnicos y acompañamientu profesional pal desenvolvimientu y presentación del so proyectu. Llaboral va correr a cargu del agospiamientu y va apurrir una bolsa de viaxe hasta un importe máximu de 150 euros brutos.
La residencia va tener una duración máxima de dos meses ente abril y xunu, mientres los cualos la persona beneficiaria va disponer d’un espaciu de trabayu y agospiamientu, si fuera necesariu. La resultancia de la residencia va materializase nuna esposición del 23 de xunu al 5 de payares na galería de Llaboral.
La selección de los proyectos ganadores va correr al cargu de un xuráu formáu por personal de Llaboral Centru d’Arte y Creación Industrial y un miembru esternu. Les propuestes han de presentase al traviés de la plataforma web: http://labjoven6.laboralcentrodearte.org
