LLABoral Centru d’Arte y Creación Industrial foi seleccionáu como sociu oficial de la Nueva Bauhaus Europea, una propuesta de la Comisión Europea pa llevar el Pactu Verde a tolos territorios y fomentar un esfuerciu colectivu pa construyir un futuru sostenible ya inclusivu.
Esti proyectu, que favorez l’alcuentru ente l’arte, la cultura, la inclusión social, la ciencia y la tecnoloxía, forma parte del plan de recuperación tres l’impactu de la covid-19 y vincula a instituciones de delles naturaleces al rodiu de dellos oxetivos comunes. En términos xenerales, la iniciativa persigue tresformar l’entornu actual, reducir emisiones y crear valor social a llargu plazu.
La Nueva Bauhaus Europea articúlase al rodiu de dellos exes temáticos: reconectar cola naturaleza, recuperar el sentíu de pertenencia, dar prioridá a los llugares y persones que más lo necesiten, fomentar el pensamientu a llargu plazu, el ciclu de vida y la integración nel ecosistema industrial.
Mientres los primeros meses d’esta propuesta, xuniéronse más de 300 entidaes de toda Europa, participando en alcuentros y actividaes pa recabar contribuciones qu’ameyoren la vida cotidiana de la ciudadanía europea. Nesta segunda fase, va tratase de dar sentío a tolo recoyío y entamar a traducilo en polítiques y acciones sociales.
LLAboral yá vino trabayando en sintonía con estos oxetivos y va continuar organizando actividaes pa contribuyir a estes reflexones comunes dende la realidá d’Asturies. Asina, esti mes programáronse una conferencia y un taller sobre biomateriales y alternatives sostenibles na producción de nuevos materiales y les sos aplicaciones creatives.
