Quince sales p’acoyer xuntes, xornaes y congresos, un teatru con más de 1.200 localidaes y espacios singulares… Llaboral Ciudá de la Cultura recibió esti xueves en Madrid el Premiu Eventoplus d’Oru na categoría ‘Meyor Espaciu’ d’España. L’edificiu cunta con más de 130.000 metros cuadraos que permiten acoyer eventos únicos y estremaos nun espaciu monumental y versátil.
Precisamente la flexibilidá del espaciu, les facilidaes de montaxe, les posibilidaes de personalización, la so estética y arquitectura o l’impactu causáu ente’l públicu fueron dalgunos de los criterios valoraos pol xuráu. Los galardones del sector d’eventos y xuntes n’España y Portugal busquen fomentar les bones práctiques.
Llaboral Ciudá de la Cultura yá fuera reconocida por Turespaña anguaño como ún de los diez meyores espacios históricos pa la celebración d’eventos n’España. L’organismu incluyó al complexu monumental nel so folletu de promoción internacional. El folletu, tituláu ‘Espacios singulares de xuntes’, supunxo una oportunidá p’aumentar la visibilidá de la Llaboral como espaciu congresual ente axencies d’eventos internacionales.
