Ciencia y Arte entemécense en Llaboral sol marcu del proyectu européu STUDIOTOPIA, una iniciativa destinada a promover les collaboraciones ente artistes y científicos pa trabayar sobre los retos del presente. Anguaño, el programa enmárcase sol conceptu del Simbioceno, un términu acuñáu pol filósofu australianu Glenn Albrecht qu’esplora un futuru nel que les especies (humanes y non humanes) establezan relaciones de collaboración sostenible y beneficioses pa dambos.
El proyectu ta formáu por 11 instituciones europees, onde caúna formó un Comité de Retu Local con espertos encargaos de definir un retu, o llinia d’investigación, que los artistes y científicos van afrontar mientres la so residencia. Les residencies van tener llugar mientres l’añu 2025 en 11 países europeos.
La convocatoria, de calter internacional, ufierta dos modalidaes de residencies:
Residencies pa Mozos Científicos: esta llínea ufierta 10 residencies a mozos científicos pa collaborar, mientres doce meses, con diez artistes contemporaneos establecíos. Al traviés d’esta collaboración, los mozos científicos van tener la oportunidá d’ampliar los sos horizontes d’investigación y contribuyir a un diálogu interdisciplinar de gran impactu.
Residencies p’Artistes Emerxentes: 8 artistes emerxentes van poder trabayar mientres un añu con científicos establecíos, afrontando cuestiones locales venceyaes al desenvolvimientu sostenible. Esta residencia ufierta una oportunidá pa que los artistes s’enfoten na investigación científica y esploren el papel del arte a la d’enfrentar los retos medioambientales.
En dambos casos la nacionalidá del solicitante ha ser distinta a la del artista/científicu establecíu, que figura na convocatoria. Llaboral Centru d’Arte va acoyer una de les 8 residencies d’artistes emerxentes del programa. L’artista o colectivu artísticu escoyíu va trabayar conxuntamente col científicu Felipe Lombó p’afrontar el retu plantegáu que lleva por títulu Comerse la vida: colaboraciones entre nuestros cuerpos y otras especies.
El Comité d’Espertos de Llaboral, que va apurrir al artista asesoramientu, orientación y contactos con organizaciones, ta formáu por: Felipe Lombó, Doctor en Bioloxía, Catedráticu pola Universidá d’Uviéu y responsable del grupu d’investigación BIONUC (Biotecnoloxía de Nutracéuticos y Compuestos Bioactivos); María Castellanos, Doctora en Belles Artes ya investigadora, y GRIGRI, asociación cultural con una investigación y práctica centrada nel diseñu participativu, la intervención urbana y los procesos comuñales de calter transdisciplinar.
