El plenu del Conseyu del Patrimoniu Cultural d’Asturies aprobó güei los proyectos pa la restauración de dos bienes d’interés cultural (BIC): el monesteriu de Villanueva, nel conceyu de Cangues d’Onís, y el Muséu Arqueolóxicu d’Asturies, n’Uviéu.
La restauración del monesteriu cangués, qu’anguaño s’utiliza como Parador Nacional, va tar impulsada por Turespaña y incluye delles actuaciones sobre la torre del complexu monásticu, el claustru y la casona indiana asitiada nel mesmu recintu. El cenobiu de San Pedro de Villanueva foi declaráu en 1907 Monumentu Históricu Artísticu, figura de protección anguaño asemeyada a la de BIC.
Esta actuación finánciase con cargu a los fondos europeos Next Generation EU y tien un presupuestu de llicitación de 2,2 millones. El proyectu plantega estes actuaciones:
- Tratamientu de les fachaes del monesteriu afectaes por humedaes.
- Meyora de l’accesibilidá a los restos arqueolóxicos espuestos nel edificiu principal del monesteriu.
- Meyora del drenaxe nel claustru principal.
- Acondicionamientu integral de la Casa del Indianu, de mediaos del XVIII, pal so usu cultural.
- Creación d’un percorríu esterior monumental del monesteriu y de la ilesia, incluyendo iluminación nocturna.
Meyores d’accesibilidá nel Muséu Arqueolóxicu d’Asturies
Per otru llau, aprobóse un proyectu de meyores na sede del Muséu Arqueolóxicu d’Asturies, nel vieyu monesteriu de San Vicente d’Uviéu y nel so edificiu anexu, que foi declaráu Monumentu Nacional en 1934, anguaño BIC.
El proyectu incluye estes actuaciones:
- Reteyáu de la cubierta del claustru.
- Arreglu de les cubiertes y elementos de cinc del restu del edificiu.
- Cambéu del sistema de zarru de les arcaes de la fachada principal del edificiu con una solución acristalada pel interior de la fachada.
- Arreglos de l’accesibilidá na entrada principal al edificiu.
Esta intervención va executase en dos fases. La primera va centrase na cubierta plana transitable asitiada sobre la sala d’esposiciones temporales, y la segunda, na cubierta del almacén suétanu. El presupuestu global de la obra xube a 217.000 euros.
La Asunción de la Virgen, BIC nuevu
A lo último, el plenu emitió informe final favorable a la tramitación pa declarar BIC la obra La Asunción de la Virgen, d’El Greco, de la que dispón la Fundación Selgas-Fagalde. Na tramitación d’esti espediente llográronse los informes positivos de la Universidá d’Uviéu, la Real Academia de la Historia y el Real Institutu d’Estudios Asturianos (Ridea).
Órganu asesor pa la protección del patrimoniu
El Conseyu de Patrimoniu Cultural ye un órganu colexáu permanente y asesor de l’Alministración d’Asturies, dedicáu a la protección, investigación, fomentu y espardimientu del patrimoniu cultural asturianu.
Les sos funciones incluyen la emisión d’informes y dictámenes a solicitú de les alministraciones públiques, la propuesta d’inclusión de bienes en categoríes de protección, la supervisión de planes de caltenimientu y la emisión d’informes preceptivos en procedimientos rellacionaos con bienes d’interés cultural. Amás, asiste a l’Alministración na adopción de midíes pa la protección y promoción del patrimoniu cultural d’Asturies.
