Énte la iniciativa promovida pol conceyal de movilidá del Conceyu de Xixón, Pelayo Barcia, d’abandonar los ciclocarriles ensin nenguna alternativa, dexando en manos de la gastadura la so final, l’Observatoriu xixonés de Movilidá amosó la so esmolición pol riesgu físicu y xurídicu qu’esto supón.
A esta esmolición súmase la falta d’estudios y estadístiques nes que sostener esta midida. El mesmu xefe de Gabinete de l’Alcaldía, Fernández-Paíno Sopeña, declaró n’Onda Cero’l 24 de payares que los ciclocarriles suponen “un riesgu pa toos”, refiriéndose a persones que se mueven en bicicleta, vehículos de movilidá personal y vehículos privaos a motor. Sicasí, añedió que nun asocediera nengún accidente nestos, magar de que nos postreros 2 meses na ciudá reportáronse 426 accidentes, lo que contradiz el so discursu. Desgraciadamente, nun s’apurrieron datos o estadístiques que demuestren el supuestu riesgu d’estes alternatives, nin s’ufierta tresparencia dalguna.
Recuerden como asociación pola movilidá que’l peligru nun se cuantifica en costumes o percepciones personales y que si esisten pruebes de lo contrario, los responsables d’esta decisión tendríen d’apurriles.
Amás, con esta midida nun s’especifica en qué momentu l’estáu dexenerativu de la señalización horizontal de la vía va ser indicativu de la so vixencia. Esto supón un riesgu real pa cualquier usuariu de la cai y un riesgu xurídicu, yá que dexa en manos de la percepción de la vía la validez de la so señalética.
Tamién amosaron la so esmolición pola falta d’alternatives en construcción o planificación per parte de la conceyalía. Tamos d’alcuerdu en que la meyor solución ye construyir infraestructura dedicada y segura, so unos estándares calidables mínimos, pero nesti momentu nun esiste nengún proyectu o propuesta pa les rutes afectaes, delles básiques pa la rede ciclista.
Por too ello piden al equipu de gobiernu que nun faiga política de la desdexación de funciones, proponga eses alternatives lo antes posible y que les execute antes de tomar cualquier decisión que suponga un retrocesu en movilidá.
