L’asociación de movilidá sostenible Observatoriu Xixonés de Movilidá (OXM) por aciu un video espublizáu nes sos redes sociales solicita al Conceyu de Xixón completar el carril bus de l’Avenida de la Costa col agregu d’una nueva sección de carril bus al altor de la Casa Rosada.
El tramu propuestu asítiase ente La Gota de Lleche y la sección de l’avenida que cola reforma rematada en 2023 incluyó un carril bus. Específicamente ente la cai Palacio
Valdés y l’encruz de Puerta la Villa (Constitución con Schultz y Costa). Esti tramu mide unos 115 metros de llargor y nél esisten 3 carriles de circulación xeneral. El carril izquierdu, el más cercanu a la mediana central, da a parar d’imprevistu col nuevu carril bus. Esto, pa l’asociación, xenera tracamundiu ente los conductores, quien, ensin dase cuenta, pueden terminar circulando pol carril esclusivu p’autobuses al dir nel tramu previu por unu convencional. El OXM cree que la solución al problema pasa necesariamente por enllargar el carril bus nesti tramu.
Sicasí, el principal motivu pol que l’asociación reclama’l carril bus ye pa facilitar el trayectu que realicen les llinies d’EMTUSA 1, 16, 18 y 20. Considera que los miles d’usuarios qu’empleguen acaldía estes llinies tendríen un viaxe más cómodu y eficiente ente La Gota Lleche y Begoña. L’Observatoriu recuerda que la idea nun ye nueva. En 2023 xunto al proyectu d’Intercambiador del Humedal púnxose sobre la mesa incluyir un carril bus nesti pequeñu tramu, magar s’allugaría nel carril derechu en cuenta de nel izquierdu, como reclama OXM.
Cola defenestración del proyectu d’Intercambiador a l’asociación paez-y urxente poner en valor de nuevu al tresporte públicu como principal opción de movilidá d’El Centru. Polo tanto cree qu’esti carril bus, por pequeñu que seya, ye un bon pasu a dar. A nivel técnicu, el OXM considera que la presencia de 3 carriles de circulación ye innecesaria. Primeramente esiste una gran descarga de tráficu dende Palacio Valdés escontra la cai Decanu Prendes Pando y darréu escontra l’avenida de Manuel Llaneza realmente namás hai un únicu carril de circulación, yá que’l segundu incorpórase a Plaza Europa y el terceru ye carril bus-taxi. Sía que non, l’Observatoriu amuesa’l so refugu a la esistencia de viales tan anchos en plena zona urbana. El OXM estima que se va tratar d’una intervención mínima, un meru cambéu de la señalización, especialmente de la horizontal.
