El Centru Integráu de Formación Profesional de Comunicación, Imaxe y Soníu de Llangréu, CIFP CISLAN, anovó un añu más la so collaboración col Festival Internacional de Cine de Xixón, FICX, nel so 60 edición, para la realización d’actividaes conxuntes de calter educativu. Ente elles atópase la celebración d’una sesión dedicada a presentar productos audiovisuales ellaboraos pol alumnáu. Trátase d’una actividá qu’empezó en 2019 con gran acoyida y qu’anguaño se celebrará a les 19:30 hores del sábadu, 12 de payares, na Escuela de Comerciu de Xixón y que cunta cola presencia de profesoráu y estudiantes del centru.
La collaboración col FICX tamién va convertir el salón d’actos del Centru de Comunicación, Imaxe y Soníu de Llangréu en see de dos actividaes especialmente dedicaes al alumnáu. La primera d’elles celebraráse este mesmu vienres, 11 de payares, con una masterclass del guionista y presentador Alex G. Calvo. Y va haber qu’esperar hasta’l 18 de payares pa poder asistir a una charra-entrevista formativa impartida pol cineasta Eloy Domínguez Serán.
La participación ente dambes entidaes va completase cola asistencia de los estudiantes del ciclu formativu de grau superior de Producción d’Audiovisuales y Espectáculos a delles de les actividaes del FICX PRO, xornaes pa profesionales del sector que s’enmarquen dientro del propiu festival y qu’esta adición van poner especial atención a la distribución del cine independiente y a la sostenibilidá na industria cinematográfica.
