La banda Agro-Rock va dispidir la xira Añu 1D.C. (Dempués del Covid) con un conciertu na sala Albéniz de Xixón el 12 xineru. Santiago, Santander, Zamora, Madrid o Asturies foron dalgunos de los llugares nos que la xira Añu 1 D.C (Dempués del Covid) fixo parada. Los de Tolivia entamaron a primeros de 2022 nel Centru Niemeyer una riestra de conciertos pa celebrar los sos 35 años de carrera. Una xira especial na que participaron dellos collacios como la Banda de Música de Pravia, Miguel Fernandi «Burilo», Nando Agüeros o los Gaiteros del Carbón, ente otros, y na que congregaron a más de 30.000 persones nel conciertu de Poniente en Xixón.
Nestos dos años de xira, el grupu fixo varies publicaciones como’l «Diccionariu Berrón», un llibru con pallabres o espresiones escuchaes una y mil veces de boca de la xente del pueblu, pallabres que suenen siempre a verdá, tanto pa quien les diz como pa quien les siente y que yá dende los anicios, muncha xente entamó a calificales como “auténtiques”. El Diccionariu Berrón Inclúi les ilustraciones de Neto García del Castillo y testos de David Villa, Aitana Castaño, Alex Galán, Marisa Valle Roso, Pablo Texón, David Castañón y Montse Tomé. Tamién publicaron un llote de cerveza artesano conmemorativu, varios modelos de camisetes, sudaderes o sombreros de paya.
El vienres 12 xineru a les 21:30 na sala Albéniz de Xixón dispídise la xira con un conciertu especial, pal que se puen adquirir les entraes anticipaes a partir d’esti martes 12 d’avientu a les 12:00 hores – 18 euros – en www.losberrones.com o’l mesmu día del conciertu en taquilla – 22 euros.
