La Conseyería de Cultura, Política Llingüística y Turismu, al traviés del programa Asturies Cultura en Rede, va movilizar hasta’l próximu mes de xunu 701.500 euros pa llevar 465 espéctaculos y actividaes per tol territoriu asturianu. La Cinemateca Ambulante, que programa trimestralmente, va llevar a cabu 103 proyecciones en 22 conceyos hasta’l mes d’abril.

La planificación de les programaciones nos distintos circuitos d’Asturies, Cultura en Rede, respuende a la selección realizada nes convocatories pa los circuitos de Música, Artes Escéniques, Lliteratura, Cultura Tradicional, Artes Plástiques y Visuales, el circuitu Xacobéu y La Cinemateca Ambulante. A esta programación va sumase d’equí a poco la del circuitu Autores nel Camín, que tien un presupuestu de más de 50.000 euros.

La Conseyería de Cultura punxo en marcha los circuitos culturales del programa Asturies, Cultura en Rede n’ochobre del 2019 cola mira d’ampliar la ufierta empobinada a creadores de les distintes disciplines culturales y de facilitar la programación d’espectáculos y eventos per tol territoriu asturianu.

Los circuitos culturales mándense por un sistema de cofinanciación ente’l Gobiernu d’Asturies y les alministraciones locales mediante’l cual la Conseyería de Cultura aporta ente’l 50 y el 90 % del presupuestu de cada esposición, espectáculu o eventu cultural, dependiendo del porcentaxe de la población de los conceyos, de forma qu’aquellos con menos habitantes reciban siempre una cantidá mayor.

Les cifres de los distintos circuitos culturales pal semestre próximu (sacante La Cinemateca Ambulante, que programa de forma trimestral) son estes:

  • Circuitu d’Artes Escéniques. Los 44 artistes, compañíes y empreses escoyíos van protagonizar 115 funciones en 41 conceyos asturianos. A esti circuitu destínense 270.000 euros na convocatoria d’esti semestre.
  • Circuitu de Música. Los 43 artistes y grupos solicitaos por 37 conceyos van realizar 49 conciertos. La inversión pa esti circuitu ye de 92.000 euros.
  • Circuitu de Cultura Tradicional. Ventidós profesionales van protagonizar 69 eventos en 27 conceyos. El presupuestu supera los 49.000 euros.
  • Circuitu de Lliteratura. 71 eventos de 31 creadores van llegar a 34 conceyos. Nesta convocatoria, la inversión ye de 46.000 euros.
  • Circuitu d’Artes Plástiques y Visuales. Diez artistes y galeríes, escoyíos nes dos últimes convocatories, van llevar a cabu 19 esposiciones en 12 conceyos. Hasta esti vienres próximu, los conceyos participantes nos circuitos puen solicitar entá más programación. Los costos de la producción de los 12 proyectos escoyíos na última convocatoria xuben a 100.000 euros.
  • Circuitu Xacobéu. Con un presupuestu de 74.000 euros, el circuitu incluye 39 eventos de 23 compañíes y empreses, que van llegar a 18 conceyos.
  • Llaboral Cinemateca. El ciclu de cine itinerante La Cinemateca Ambulante programa hasta abril 103 proyecciones en 22 conceyos, con un presupuestu de 20.500 euros.

La programación de los circuitos d’Asturies, Cultura en Rede pue consultase na páxina web asturiesculturaenrede.es.