Xixón va caltener la delimitación de la zona de gran arribación turística. La Xunta de Gobiernu del Conceyu aprobó la propuesta que caltién les llendes aprobaes en 2015. Esta área coincide col centru comercial Abiertu Xixón Centro y concentra la mayor ufierta hotelera de la ciudá, con equipamientos culturales de primer orde, como’l Teatru Xovellanos o’l Centru de Cultura Antiguu Institutu. Amás, ye’l puntu de llegada del tresporte que tresllada a los turistes de cruceros dende’l puertu d’El Musel hasta los Xardinos de la Reina.
Esti Centru Comercial Abiertu foi galardonáu col Premiu Nacional de Comerciu 2015 poles sos actuaciones en materia de turismu de compres. Per otra parte, tal que recueye l’estudiu realizáu pola empresa InvesMark, ‘El turismu en Xixón 2018’, los llugares d’interés turísticos visitaos en Xixón son el cascu antiguu y Cimavilla nun 88,1%, el Puertu Deportivu nun 83,9% y les sableres nun 82,2%.
La radiografía del turista de Xixón ye d’una persona que se mueve por vacaciones y ociu, visita’l centru de la ciudá onde s’atopa’l cascu antiguu, Cimavilla, el Puertu Deportivu y les sableres, muévese a pie nes sos visites y fai compres. Tocantes a la llimitación temporal, propónense como domingos d’apertura los díes 9 y 30 d’agostu de 2020. L’equipu de gobiernu xustifica esti primer domingu por ser l’entamu d’eventos tan importantes como la Selmana Grande y la Feria Internacional de Muestres. Nel casu del 30 d’agostu escoyóse esta fecha al coincidir cola Fiesta de la Sidra Natural.
