Podemos-Equo Xixón presentó esti miércoles el so códigu éticu, un documentu que van roblar toos y toles candidates de la coalición: «Énte quien piensen qu’en política tol mundu ye igual, nesta candidatura diferenciámonos del restu de formaciones por cuestiones como esta: nuna ciudá na que ye poco la xente que cobra 2.700 euros netos al mes Podemos-Equo Xixón adquier el compromisu de nun cobrar más del equivalente 2,2 vegaes el Salariu Mínimu Interprofesional, 1.980 euros, y a llindar los mandatos a ocho años nes instituciones», espón Juan Chaves, integrante de la candidatura. «Creemos que na política ye un serviciu públicu nel qu’hai que tar de camín y nun faer d’ella un oficiu vitaliciu”,
La coalición va plantegar al restu de partíos con presencia na Casa Conceyu que faigan sos estos compromisos «pa dar un mensaxe a la ciudadanía de Xixón de qu’en política nun somos toos iguales y de que tenemos que ser como la xente a la que representamos», añade Chaves. Estes cuestiones van presentar nel primer Plenu de la nueva Corporación coles mires de que toles fuerces asuman la llimitación de sueldos y tamién el númberu de persones con dedicación, qu’anguaño llega a 21 conceyales.
«Nel casu de qu’estes midíes nun sían aprobaes, los conceyales de Podemos-Equo Xixón sí van acatar esti códigu éticu y van arrenunciar a tola remuneración qu’entepase los 1.980 euros. Col escedente vamos faer un fondu común pa financiar a les ONGs y entidaes sociales de la nuesa ciudá», indica Laura Tuero, númberu dos de la candidatura.
Un compromisu éticu que yá se fixo efectivu esti mandatu que termina. Los conceyales de Xixón Sí Puede asumieron dende’l primer momentu la llimitación de salarios que marca Podemos, coles modulaciones correspondientes en función de les situaciones personales de quien tienen fíos o persones mayores o dependientes a cargu. «De los cuatro conceyales con dedicación plena que se asignaben al grupu municipal en 2015, namás s’aceptaron trés, arrenunciando a una d’elles y los conceyales cotizaron al 75% del salariu, lo qu’en conxuntu dexó aforrar 200.000 euros pa la ciudá de Xixón», afirma Tuero, remarcando que «somos la única organización en Xixón que se presenta con un códigu tan estrictu».
Esti códigu éticu va aplicase a toos integrantes de la formación, incluyida quien ocupe l’alcaldía: «Frente a los 4.500 euros que cobra anguaño la primer edil, Carmen Moriyón, Yolanda Huergo va tener un salariu de 1.980 euros nel casu d’ocupar l’alcaldía», apunta’l númberu dos de la candidatura.
«A pesar de qu’en 2015 José María Pérez, voceru del grupu municipal del PSOE, nun aceptó roblar esti códigu, sí vamos encamentar a Ana González y a tola so candidatura a qu’asuma estos compromisos éticos que llevamos al Conceyu de Xixón», adelantra Laura. Tuero.
«Nun tenemos puertes xiratories, vinimos ameyorar la vida de la xente, non a buscar puestos de trabayu en grandes empreses o corporaciones como faen otros, polo que nun va ser posible que nengún de los conceyales pueda ocupar, nel plazu de cinco años posteriores a la finalización del mandatu, nengún altu cargu executivu n’empreses venceyaes con decisiones del so mandatu. Namás entendemos la política de forma participada, tresparente y al serviciu de los xixoneses», caltien el númberu dos de la candidatura.
