La entrada a valir de la reforma llaboral impulsó un récord de contratos indefiníos en febreru: 3.947, un 14,11% más qu’en xineru y un 134,94% más que nel mesmu mes de 2021.
Los datos espublizaos güei pol Ministeriu de Trabayu y Economía Social constaten que los contratos indefiníos representen yá’l 18,67% de tolos rexistraos nel Principáu, cuando lo habitual yera que nun superaren el 10%. Nos dos primeros meses del añu fueron 7.406 les contrataciones indefiníes suscrites na comunidá autónoma.
Al respective de xineru, el desempléu baxó en 100 persones (un 0,15%) hasta asitiase en 66.189 paraos, en niveles de 2008. Por sectores, baxó na industria, la construcción y los servicios. Al contrariu, xubió nel colectivu ensin empléu anterior y nel sector primariu. Por sexos, menguó ente los homes y aumentó ente les muyeres.
Los datos más llamativos danse nel cómputu interañal: un descensu de 19.592 persones (22,84%), con pronunciaes cayíes ente los menores de 25 años (38,75%), nel colectivu ensin empléu anterior (29,85%), na construcción (25,86%) y na industria (24,68%).
Ye’l mayor descensu interañal de tola serie histórica, col qu’Asturies enllaza yá 11 meses siguíos de cayíes. Esta evolución ye especialmente relevante si tenemos en cuenta qu’en febreru del añu pasáu marcárase nel Principáu’l nivel de desempléu más altu de tola pandemia: 85.781 paraos frente a los 66.189 actuales.
Otramiente, en relación con febreru de 2020 hai 6.751 paraos menos (-9,26%), cifres polo tanto anteriores a la pandemia.
Per otru llau , Asturies rexistró’l mes pasáu 367.628 persones afiliaes a la Seguridá Social, lo que supón un aumentu del 0,28% al respective de xineru y la creación de 1.035 puestos de trabayu. En términos interañales, la comunidá recuperó nel últimu añu 11.276 cotizantes. Anguaño, hai 4.603 afiliaos a la Seguridá Social más qu’en febreru de 2020. Poro, hai más cotizantes qu’antes del españíu de la crisis sanitaria.
En febreru, la Seguridá Social tenía rexistraes a 2.359 persones en situación de regulación d’empléu, de les que 1.689 yeren espedientes covid. Ye la cantidá más baxa dende l’entamu de la pandemia.
