Les pieces, atopaes nuna cueva d’El Picu les Torres, en Ribeseya, son un testimoniu escepcional de les ferramientes de guerra d’esti periodu na península ibérica
La conseyera de Cultura, Berta Piñán, destaca’l valor incalculable del descubrimientu, datáu va más de 2.500 años, que va exhibise de manera temporal con un videu esplicativu
El Muséu Arqueolóxicu d’Asturies incorporó a la colección dos pieces úniques nel repertoriu del armamentu prehistórico europeo descubierto hasta’l momentu. Trátase de dos cascos metálicos de la Edá del Fierro, con una datación que s’asitia nel sieglu VII e. C., va más de 2.500 años. Los dos cascos de bronce atopáronse nuna cueva d’El Picu les Torres, na contorna del pueblu rioseyanu de Cueves. Xunto a les dos pieces recuperáronse tamién restos óseos y cerámicos.
Los dos casquetes presenten munches asemeyances formales, pero los primeros estudios consideren que los fabricaron artesanos diferentes nun periodu que podría asitiase ente últimos de la Edá del Bronce y primeros de la Edá del Fierro, el momentu históricu cuando apaecen los primeros castros n’Asturies. Dambes pieces fixéronse sobre una placa de bronce con encaxe simétricu doble pa sofitar penachos o cornamenta; llucen apliques fundíos en bronce plomao y fixaos con remaches, y decórense con bandes repuxaes.
La conseyera de Cultura, Política Llingüística y Turismu, Berta Piñán, presentó güei esti descubrimientu, acompañada pol director xeneral de Cultura y Patrimoniu, Pablo León, y l’equipu técnicu del Muséu Arqueolóxicu d’Asturies que s’encargó del estudiu, análisis y tratamientu curativu de les pieces de magar se descubrieron, n’avientu del 2020, gracies al avisu d’un particular.
“Güei ye un día bien importante y feliz p’Asturies porque recuperamos un testimoniu de valor incalculable pa conocer meyor quién fomos y cómo vivimos. El trabayu tan estraordinariu del equipu del Muséu Arqueolóxicu dexónos sumar a la so colección dos pieces que representen un testimoniu únicu de la Edá del Fierro na península ibérica y n’Europa”, destacó Berta Piñán.
La Conseyería promovió en cuantes se fixo’l descubrimientu les actuaciones técniques preceptives pa caracterizar arqueolóxicamente’l xacimientu, determinar les midíes de protección afayadices y empezar l’estudiu exhaustivu de les pieces tal como se recuperaron, amás de la so llimpieza y restauración posterior atendiendo a criterios d’intervención mínima y respetu máximu al orixinal.
Curtiu documental
Les pieces van quedar espuestes temporalmente na sala del Muséu Arqueolóxicu dedicada al alborecer de la cultura castreña o primer Edá del Fierro. Amás de los paneles esplicativos correspondientes, va proyectase un curtiu documental onde se fala del procesu que se siguió nel tratamientu de les pieces desque se descubrieron. El reportaxe ilustra de manera didáctica cómo ha atendese una afayadura arqueolóxica hasta la so conversión en documentu históricu.
La intervención arqueolóxica fecha nel xacimientu d’El Picu les Torres apunta a que se trata d’un depósitu ritual dientro d’una cueva con un usu ceremonial que se remonta a tiempos prehistóricos, pero que de mano paez que nun se rellaciona con práctiques funeraries.
El procesu d’estudiu exhaustivu, coordináu por personal del Muséu Arqueolóxicu d’Asturies, tuvo la collaboración de delles instituciones científiques del país. Primero de facer la llimpieza y afianzamientu de los dos cascos nos talleres de restauración del Muséu Arqueolóxicu d’Asturies, les pieces sometiéronse a dellos estudios técnicos nel Llaboratoriu de Microscopia Electrónica y Microanálisis del Institutu d’Historia del Conseyu Superior d’Investigaciones Científiques. Les pruebes dexaron caracterizar de manera metalográfica les pieces gracies al usu de los equipos técnicos del CSIC y del Muséu Arqueolóxicu Nacional.
L’estudiu del llote de material cerámico, fecho a comuña col Departamentu de Prehistoria y Arqueoloxía de la Universidá de Granada, va dexar determinar la procedencia del barru colo que se fabricaron los vasos, les técniques de manufactura y ye posible que tamién lo que contuvieron dacuando. Amás, la Facultá de Bioloxía de la Universidá d’Uviéu ta collaborando nos primeros análisis de los restos óseos recuperaos.
El Muséu Arqueolóxicu d’Asturies va coordinar l’estudiu históricu de les pieces que tien qu’interpretar el significáu del descubrimientu nel contestu de la Edá del Fierro rexonal y l’hábitat fortificáu del oriente asturianu. Asina, los espertos van examinar los cascos usaos n’otres rexones d’Europa pa rastrexar posibles afinidaes formales y simbóliques dende Oriente Mediu hasta les rexones atlántiques.
El videu esplicativu sobre l’afayadura pue descargase d’esti enllaz: https://cutt.ly/OHUec7i
