El Xulgáu de lo Contencioso-Alministrativu númberu 1 de Xixón falló a favor del recursu que Vox presentó’l pasáu mes d’ochobre contra’l Plan de Normalización Llingüística municipal, informó esti xueves la vocera y conceyala d’esti grupu, Sara Álvarez Rouco, que permitió la investidura de l’actual alcaldesa Carmen Moriyón al sofitala naquel momentu.
Esti resultáu que tumba’l Plan de Normalización Llingüística de Xixón ye’l resultáu del escasu trabayu ya interés del gobiernu de la ciudá por sacar alantre esti proyectu: falta la memoria económica, una consulta pública a los ciudadanos sobre’l so conteníu, la publicación del mesmu na web y en medios, los informes necesarios pa facelo y la so publicación nel Plan Normativu Añal.
Les reacciones nun tardaron en llegar. Una de les primeres en facelo foi Olaya Suárez, de Podemos, argumentando que «s’atropellen d’esta forma los derechos llingüísticos a pidimientu de la ultraderecha, porque amás lo que s’anuló ye un plan de mínimos ensin nenguna fuerza venceyante. Nun ye una ordenanza nin un reglamentu, y sería esmolecedor que los tribunales taracen la capacidá de les instituciones d’emplegar preseos como esti plan pa impulsar polítiques d’interés xeneral. Queda claro una vegada más que la única garantía de seguridá xurídica pa protexer el futuru del idioma, y el derechu de los y les asturianes a falar na llingua que prefieran, ye la oficialidá del asturianu. Y por eso esti sábadu hai que salir a la cai a reivindicalo una vegada más».
