Los soníos celtes del grupu gallegu Luar Na Lubre van enllenar esti sábadu, 2 d’avientu, el Teatru de la Llaboral de Xixón pa presentar los cantares del so nuevu trabayu ‘Luar Na Lubre XX. Encrucillada’, que recueye dalgunos de los temes más emblemáticos del so ampliu repertoriu, cola participación de distintes voces que pasaron pol grupu, amás d’una cronoloxía fotográfica y lliteraria de la so dilatada hestoria, colos testimonios de más de 60 personalidaes de la música, la lliteratura y el periodismu.
Luar Na Lubre ufiertó más de 2.500 conciertos en más de 40 países, onde participó en festivales destacaos na música folk, nos qu’actuó xunto a artistes internacionales, como Mike Oldfield, The Waterboys, el llexendariu grupu The Corrs o Bob Geldof y españoles, como Víctor Manuel, Miguel Rios, Luz Casal, Ismael Serrano, Pedro Guerra o Diana Navarro.
El conciertu va celebrase nel Teatru de la Llaboral de Xixón a les 20:30 hores, y les entraes puede adquirise na web, na Recepción de la Llaboral, nel Centru d’Información Turística del Principáu d’Asturies (CITPA) n’Uviéu y nel Centru Niemeyer n’Avilés y tamién tán disponibles nel teléfonu 952 076 262, en unientradas.es y na web de Llaboral Ciudá de la Cultura.
Nos sos 37 años d’andadura musical, el grupu más internacional del folk en Galicia recibió dos Discos d’Oru, 9 Premios de la Música y otres reconocencies, dientro y fuera de Galicia. Ta formáu por Bieito Romero (gaites, acordión, zanfoña), Irma Macías (voz), Nuria Naya (violín), Patxi Bermúdez (bodhran, tambor), Pedro Valero (guitarra acústica), Xavier Ferreiro (percusión llatina, efectos), Xan Cerqueiro (flautes) y Brais Maceiras (acordión).
Luar Na Lubre fundóse na ciudá d’A Coruña (Galicia) en 1986, cola vocación d’interpretar, desenvolver y sopelexar la música y la cultura de Galicia. El so repertoriu ta basáu fundamentalmente nes músiques de raigañu, dende’l respetu, pero con perspectiva de modernidá.
‘Luar Na Lubre XX. Encrucillada’, que va ser l’últimu trabayu en formatu físicu, tien calter recopilatoriu, contien temes icónicos de tolos tiempos que fueron reinterpretaos con nueves versiones y con voces tan destacaes como Pablo Milanés, SÉS o Rosa Cedrón, ente otres.
El so trabayu discográficu númberu 20, editáu por Baía Edicións y les el CD por Warner Music, festexa un simbólicu ‘alcuentru de caminos’. Un emotivu ya importante momentu históricu al traviés d’una escoyeta de músiques, relatos, fotografíes y diversu material, pa entender lo que significa Luar Na Lubre, que va camín de cumplir 40 años de trayectoria.
