L’osu polar (Ursus maritimus) ye una especie “vulnerable” según la UICN, Xunión Internacional de Conservación de la Natura, na so Llista Bermeya d’Especies Amenazaes. La perda del so hábitat de xelos marinos y la caza son les amenazes cimeres pa la so sobrevivencia a llargu plazu. El cambéu climáticu amuésase en tola so crueldá con esta especie icónica.
D’esta miente, dende 1990 la metada de los osos polares desapaecieron. La cobertoria de xelu del océanu Articu careció un amenorgamientu del 14% ente 1979 y 2011. Pola mor de la so dependencia de la capa de xelu pal accesu a les sos preses, un periodu añal de cinco meses o más llibres de xelu provocará un ayunu prollongáu pal osu, y poro, trestornos reproductivos y fame en delles fasteres. Amás, el medre de la temperatura pue facer xorrecer les malures de les foques, les sos preses.
La gueta de petroleu, colos sos derrames y una mayor esposición al ser humanu ye otru pilancu. A los problemes citaos enfréntase cola caza furtiva y n’ocasiones“llegal” que carez. D’esta miente, caberamente la policía islandesa abatió a tiros a un exemplar qu’aportó a les sos costes, probablemente enriba d’un trozu de xelu groenlandés, coles autorizaciones llocales y l’Axencia de Mediu Ambiente qu’afitaron que l’osu taba sanu pero representaba un peligru y nun yera reasitiable. Lo mesmo que pasara en 2016.
L’Alcuerdu Internacional pa la Conservación del Osu Polar robláu en 1973 punxo fin a la so caza comercial llegal, pero inda non al furtivismu que se produz en Groenlandia y Rusia. Islandia tamién caza ballenes, alloñándose del ideal cívicu nórdicu no que cinca al mediu ambiente.
Esta especie plantígrada ye clave como depredador nel picu de la cadena alimentaria y el caltenimientu del equilibriu de los ecosistemes árticos. La soledá del osu polar énte un mundiu físicu que s’esmuz y otru humanu que lu remata ye’l símbolu del desaniciu que carez la fauna y en xeneral el planeta énte la cada vegada mayor velocidá con que xorrez el cambéu climáticu global.
