Asturies celebró ayeri’l Día de les escritores cola concesión del II Premiu Amparo Pedregal, nes sos modalidaes de poesía y trabayu d’investigación con perspectiva de xéneru, a María Luisa López Diz y Patricia Borge Fernández, respectivamente.
De la obra A la sombra de los ceibos, de María Luisa López, ganadora na llínea de creatividá lliteraria, el xuráu destacó’l so valor poéticu y l’aportación de conteníos en materia d’igualdá ente muyeres y homes. En cuanto al trabayu d’investigación, decidió otorgar el galardón a Adolescencia y sexualidad, de Patricia Borge, pol so analís sobre l’usu que la población adolescente fai de les redes sociales y les consecuencies na educación sexual que recibe.
El xuráu del premiu tuvo presidío pola asesora de coeducación del Institutu Asturianu de la Muyer, María Antonia Moreno, ya integráu pola periodista y escritor Teresa Álvarez, la directora de la Unidá d’Igualdá de la Universidá d’Uviéu, Paz Menéndez Sebastián; la catedrática de Filoloxía Inglesa Isabel Carrera Suárez, la llibrera Mónica Iglesias García y la xefa de Negociáu d’Asociaciones, adscrita a la Dirección Xeneral d’Igualdá, Marta Rodríguez Carballo.
La directora xeneral d’Igualdá, Nuria Varela, apurrió los premios a les dos ganadores d’anguaño y a la distinguida na primer edición na modalidá de trabayu d’investigación, Nieve Fernández, pola so obra Apuntes para la compleción de la hestoria de la filosofía medieval. L’añu pasáu nun foi posible celebrar l’actu poles restricciones sanitaries derivaes de la pandemia.
Varela felicitó a les premiaes y estimó-yos el so trabayu “pola importancia que tien la conocencia como pasu previu al diseñu y puesta en marcha de polítiques públiques d’igualdá fayadices y eficaces”.
“La conocencia, prohibíu espresamente a les muyeres a lo llargo de la hestoria, ye l’alimentu de la emancipación. Les muyeres que lleen son peligroses, les muyeres qu’escriben son peligroses, les muyeres que falen son peligroses, pero solo pal patriarcáu, porque son absolutamente necesaries pa les sociedaes del sieglu XXI”, señaló la directora xeneral.
Nel actu tamién se rindió homenaxe a la escritora asturiana Carmen Gómez Güeya, Premiu Nadal 1982 y apocayá finada.
