La compañía Luz, micro y punto va trabayar n’axustes técnicos del so espectáculu Estrellas sonoras los díes 31 d’ochobre y 1 de payares nel Teatru de la Llaboral. La obra estrenóse’l pasáu 2 d’ochobre nel Auditoriu Príncipe Felipe dientro de la programación de La Nueche Blanca d’Uviéu.
Estrellas sonoras ye un espectáculu de teatru de sombres con música en directu sobre muyeres compositores a lo llargo de la hestoria, con pieceas musicales que van dende’l sieglu XIX hasta l’actualidá. Tres una estensa investigación sobre música compuesta por muyeres, Luz, micro y punto realiza una selección de melodíes que trescienden y xúnense col arte visual, un tipu de música que nun esistiría si nun esistiera a la vez una imaxe que l’acompañe y viceversa. Basándose nesta música incidental, la compañía desarrolla hestorias y semeyes suxeríes poles pieces musicales y les vides de munches muyeres compositores, que son interpretaes en directu por Los Músicos de Bremen.
Mel Bonis, Cécile Chaminade, Raquel Rodríguez, Anne Dudley, Elena Kats-Chernin, Rachel Portman y Yoko Shimomura son dalgunes de las compositores de les melodíes que formen parte de la obra.
Patricia Toral y Chantal Franco, al frente de Luz, micro y punto, son les autores y directores del espectáculu, que cunta cola música en directu interpretada por Los Músicos de Bremen, con Julia Franco al pianu, Miguel Llamazares al vigulín, Aldo Mata al violonchelu y Tatiana Franco a la flauta.
Luz, micro y punto alcuéntrase trabayando na Llaboral nel marcu del Programa de Residencies del Centro de Recursos Escénicos del Principáu d’Asturies, un proyectu con sede en Llaboral Ciudá de la Cultura qu’ufre sofitu a la creación artística de les compañíes profesionales asturianes, poniendo a la so disposición recursos económicos, instalaciones y medios técnicos qu’impulsen la creación escénica de profesionales de la rexón. Llaboral Ciudá de la Cultura ye un equipamientu dependiente de la Conseyería de Cultura, Política Llingüística y Turismu y xestionáu pola Sociedá Pública de Xestión y Promoción Turística y Cultural del Principáu d’Asturies.
