El recintu ferial Luis Adaro abrió un día más les puertes a Metrópoli, nuna xornada dominical onde la xente aprovechó pa visitar ún de los festivales clave del branu xixonés y yá dende primer hora de la tarde’l públicó entamaba a aportar y pasiar peles esposiciones, puestos… ya inclusive a esperar a que la seguridá dexara pasu al escenariu principal, onde magar de les 22:30 iba empecipiar l’actuación musical programada pal domingu.
Metrópoli punxo ayeri fin a la primer fin de selmana del festival. Y fíxolo al ritmu del folk metal del ya llexendariu grupu madrilanu Mägo de Oz, que llegó a Xixón cola so nueva formación y esfrutando de la so xira 35º aniversariu.
Yeren poco más de les 22:30 cuando les lluces del escenariu s’apagaron y empezó a sentise’l prólogu d’unu de los discos qu’encumbró a Mägo, Finisterra. Darréu, del backstage surdió la banda encabezada pol batería Txus di Fellatio y qu’amosaba en Xixón una formación nueva colos vocalistes Rafa Blas, Charly López y Xana Lavey. A ellos, sumóse la vuelta al grupu de Jorge Salán y la collaboración en delles canciones de Diego Palacio, l’asturianu que forma parte del grupu Celtian.
D’esta mena, la banda repasó dalgunos de los cantares más míticos, como Satania, Satanael o Jesús de Chamberí. A poco y a poco, l’ambiente foi caldiándose hasta’l momentu final, nel que’l guitarrista Jorge Salán ufrió al públicu un solu enantes de pesllar con tres de los cantares más conocíos de la banda.
Foi’l momentu de sentir Molinos de viento y La costa del silencio. Los últimos momentos del conciertu yeren, como nun podía ser d’otra manera, pa unu de los cantares más reconocíos de la hestoria de la música española: Fiesta pagana. Tres d’ello, el grupu al completu salió a agradecer al públicu la ovación que llevaron tres el remate y mientres sonaba The best, de Tina Turner. Una nueche na que se celebró una fiesta pagana en Xixón.
La celebración de Metropoli nun remata y, per delantre, queden entá otros 7 díes de música, onde amás de tolos espacios abiertos al públicu, van tocar estos artistes:
-
3 de xunetu – Kitai (21) y Lit Killah y Enol (22.30)
-
4 de xunetu – Lágrimas de Sangre (21) y Camela (22.30)
-
5 de xunetu – Huecco (21) y Sidecars (22.30)
-
6 de xunetu – Muñeco Vudú (21) y Nicki Nicole (22.30)
-
7 de xunetu – El Niño Lord.Cah y Kyr4 (20) y MClan (22.30)
-
8 de xunetu – Nanpa Básico (21) y Ayax y Prok (22.30)
-
9 de xunetu – Fusa Nocta y Ramudo (20) y fiesta Bresh (22.30)
