El Premiu Camaretá al Meyor Cantar, promovíu pola Conseyería de Cultura, Política Llingüística y Turismu, yá tien finalistes pa la so edición del 2023. El xuráu escoyó los cuatro finalistes, que son: Marisa Valle Roso, Alienda, Jose Manuel Tejedor y Vero Rubio, toos ellos con trabayos difundíos nos meses previos a la convocatoria.
Xixón va acoyer el domingu 12 de payares la decimoquinta edición del Premiu Camaretá al Meyor Cantar. El Teatru de la Llaboral va ser l’escenariu onde los cuatro finalistes actúen pa que’l xuráu, formáu por especialistes en música y llingua asturiana, decida’l cantar ganador. Tres d’una primer deliberación el xuráu, reuníu’l xueves 22 de xunu nes dependencies de la Dirección Xeneral de Política Llingüística, fixo la selección de los cuatro candidatos pa la final. Na gala tamién va dar un conciertu’l grupu Algaire, ganadores de la edición anterior d’esti premiu col tema «Coral y maera».
El Premiu Camaretá al Meyor Cantar, dotáu con 6.000 euros, convócalu’l Gobiernu del Principáu d’Asturies cola mira de afianzar, prestixar y arriquecer la creación musical tanto n’asturianu como en gallego-asturianu. Los cuatro finalistes de esta edición son:
Marisa Valle Roso, con Tonada (lletra: Marisa Valle Roso sobre un tema tradicional) Esta intérprete llangreana lleva dedicada a la música dende la infancia y dende mui pronto destacó como una de les voces renovadores de la tonada, con una trayectoria qu’incluye dellos trabayos discográficos y les xires Marisa canta a… y Suena la mina. Collaboró con artistes de la talla de Víctor Manuel, Rozalén, Ses o Diana Navarro, ente otros.
Alienda, con Zanca de cabra (lletra: Roberto González Quevedo sobre un tema tradicional) Alienda ye un grupu de power folk, xéneru qu’amiesta música y instrumentos tradicionales asturianos con elementos d’otros estilos. Tienen grabáu l’EP Alendando (2014); y Alienda (2023), el so primer discu de duración llarga del que «Zanca de cabra» salió como adelantu nel 2022. El grupu ta formáu por Bárbara González-Quevedo (violín y voz), Illán Escalada (gaita), Francisco Rodríguez (bouzouki), Edu Llosa (percusiones), Carlos Castro (baxu) y Emilio Amboage (guitarra).
José Manuel Tejedor, con Les tos nales (lletra: Gema Fernández) José Manuel Tejedor ye ún de los gaiteros más premiaos del panorama asturianu, con tres premios Macallan del festival de Lorient, un Premiu Nacional de la Música y dellos premios AMAS. Fixo abondes actuaciones en festivales intercélticos de toa Europa, foi teloneru d’artistes como Van Morrison y Sinead O’Connor y collaboró colos nomes más destacaos del folk internacional. Esta canción pertenez al últimu trabayu, Lluz.
Vero Rubio, con Dixo miou padre (lletra: Vero Rubio) Verónica Rodríguez Rubio, más conocida como Vero Rubio, nació en Cangas del Narcea en 1981. Esta multiinstrumentista toca’l pianu, la trompeta, la trompa y el bodhram, y la so carrera desenvuélvese ente’l mundu de la música clásica, onde tuvo la oportunidá de tocar con orquestes como la Orquesta Sinfónica de Barcelona y Nacional de Catalunya (O.B.C.), y el del jazz. Anguaño, toca en dellos grupos de distintos estilos (folk, rock, improvisación llibre, jazz…): Orquesta Céltica Asturiana, Sonámbulos, Improviso… Amás compaxina esti llabor como instrumentista cola composición y producción de la so música de manera independiente.
