La cantautora orixinal de Llangréu (Asturies), Marisa Valle Roso, preséntanos güei, 30 d’abril, Se va, el tercer adelantu del que va ser el so nuevu llarga duración previstu pa principios de seronda d’este mesmu añu.
El nuevu senciellu allóñase del discursu feminista protagonizáu polos dos primeros adelantos, El tren de la libertad y Cenicientes del Carbón, pa da-y abrir un nuevu filu dientro de la so llírica: el de la despidida, nel bon sentíu de la mesma. Marisa plantéganos una retórica personal, la d’encarar les nueves situaciones siendo siempres capaces de dexar tras el pasáu y facer rellumar el futuru. En palñabra de la cantautora: “Ye un cantar de lliberación, d’aliviu y fala de soltar y de dexar colar, trata sobre cómo hai coses que nun podemos retener como’l pasu del tiempu y tolo que lleva consigo, pero hai otres a les qu’enferronamos por mieu o costume y que pa poder avanzar ye necesario deprender a despidise. Nun fala de nada en concreto, ye una cantar pa que la xente lo interprete a la so manera.”
Se va vuelve tener como protagonista una base de sintetizador que fai de colchón sonoru a la emocionante voz de l’artista a la que l’acompaña unes llinies de guitarra acústica esplotando too ello nun estribillu impactante qu’emociona gracies a la capacidá de Marisa de crear melodíes vocales úniques.
El tema sigue’l camín de llanzamientos qu’empezó a principios d’esti 2025 con El tren de la libertad y prosiguió col aclamáu, Cenicientes del Carbón, tema acoyíu n’Asturies como tou himnu pa les muyeres de les cuenques mineres.
