Marisa Valle Roso presenta Lo Fugaz nel Teatru de la Llaboral esti sábadu 15 de xineru, a les 20:00 hores. Nel conciertu na Llaboral, Marisa Valle Roso va estrenar el so últimu trabayu discográficu, nel que per primer vegada escribe y compon toes los cantares del álbum que va publicar esti 14 de xineru. L’artista asturiana yá presentó primeramente les temes Cantemos, sobro la igualdá, los derechos humanos, l’amor, el mieu, el pasu del tiempu, les decisiones, la hestoria o la superación; Desvirtuarte, cola so esencia folk y averándose al pop y electrónica; Títere o esclava, onde enceta la violencia de xéneru; y Tonada, na que xuega y reinterpreta el xéneru.
Lo Fugaz ta producíu por Charlie Bautista, con amiestos d’Iván González “Chapo” y con Bernardo Baragaño como director d’arte y fotografía.
Marisa Valle Roso ganó los principales concursos de tonada nel apartáu xuvenil. En 2009 grabó Un pasu más al pie de el so hermanu, un trabayu nel que fundía la tonada col jazz, y en 2011 publicaba en solitariu De lo fondero l´alma, un discu que recoyía los principales cantares de tonada coles que concursaba y col que recibió’l Premiu de la Crítica de Radio Televisión del Principáu d’Asturies como Meyor Discu de Cantar Asturianu del añu. Coles mesmes, Marisa Valle Roso foi estremada col Premiu Meyor Cantadora del añu dende 2006 a 2016 o colos Premiu AMES nel apartáu de Meyor Voz 2009 y Meyor Cantar Folk en 2018. En 2015 realiza la xira Marisa Canta a… versionando tarrezas de Chavela Vargas o Leonard Cohen; en 2016, la xira Suena la mina; y en 2017 publica Consciente, un trabayu personal que caltien el colores del folclore asturianu combinaos con sonoridaes contemporanees de xéneros como’l indie, el cantar d’autor o’l pop.
