El Premiu Camaretá al Meyor Cantar, promovíu pola Conseyería de Cultura, Política Llingüística y Deporte, yá tien finalistes pa la so edición del 2026: Marisa Valle Roso, Tania Pereira, Sólo y Ochobre. Los cuatro preséntense al certame con trabayos publicaos nos meses previos a la convocatoria.
Depués d’una primer deliberación, el xuráu, axuntáu nes dependencies de la conseyería, escoyó a les cuatro candidatures que van competir na final.
La xefa de serviciu de Planificación Normalización Llingüística, Juncal García, presidió un xuráu integráu por profesionales venceyaos a la creación, la interpretación y la difusión musical, ente ellos, Pablo Alonso, Alicia Álvarez, Emma Posada, Andrea Joglar y Xandru Fernández.
El Premiu Camaretá al Meyor Cantar, dotáu con 6.000 euros, ta convocáu pol Gobiernu del Principáu d’Asturies col oxetivu d’afianzar, prestixar y arriquecer la creación musical tanto n’asturianu como n’eonaviegu. Al premiu en metálico súmase la incorporación del artista ganador al circuitu Autores nel Camín, al traviés del que s’impulsen actuaciones en dellos conceyos d’Asturies.
El vienres 2 d’ochobre, Xixón va acoyer la final del Premiu Camaretá al Meyor Cantar nel Teatru de la Llaboral, onde’l mesmu xuráu va decidir cuál va ser el cantar vencedor. La gala va cuntar, tamién, cola actuación de Ferla Megía, ganador de la pasada edición con Xatu, que va presentar los cantares nos que trabayó nel últimu añu.
Los cuatro temes finalistes d’esta edición son:
Marisa Valle Roso, con La carbonera. Cantante y compositora asturiana, ye una de les voces más reconocibles de la música asturiana. La so trayectoria destaca pola reinterpretación del repertoriu tradicional dende una sensibilidá contemporánea fondamente vinculada a la memoria popular.
Tania Pereira, con Piquena.
Cantautora asturiana, desenvuelve una propuesta de raíz folk abierta a sonoridaes contemporánees, na que confluyen influencies del rock alternativu, l’indie y el pop.
Sólo, con Foles.
El cantautor turonés Alfredo González empieza col nome de Sólo una etapa artística nueva de calter más íntimu y personal, na qu’esplora rexistros sonoros nuevos. Foles ye’l primer cantar en llingua asturiana d’esti proyectu.
Ochobre, con Escuela d’amor.
Banda asturiana vinculada a la escena musical del país, combina una propuesta sonora enérxica cola fusión d’elementos tradicionales del folk y sonoridaes contemporánees.
